O alcalde reuniuse coa conselleira do Mar para trasladarlle a proposta
16 feb 2019 . Actualizado ás 10:44 h.O goberno municipal do Concello de Ourense quere facer navegable o tramo urbano do río Miño para usos deportivos e turísticos. O alcalde, Jesús Vázquez, mantivo unha reunión coa conselleira do Mar, Rosa Quintana, e co presidente de Portos de Galicia, José Juan Durán, para trasladarlles a súa proposta e pedirlles o seu apoio para executala. A pesar de que a súa actividade se centra nos portos costeiros, non é a primeira vez que se expón un proxecto deste tipo en canles fluviais.
Segundo informa o executivo local, trasladar esta idea á realidade en Ourense dependerá dos informes técnicos. Como mínimo, o goberno municipal pretende a instalación de pantaláns para que poidan ser utilizados por embarcacións de tipo deportivo ou turístico. O fin último desta iniciativa é buscar o mellor modo de pór en valor o tramo urbano do río Miño en Ourense.
O alcalde expuxo na reunión coa conselleira e o presidente de Portos de Galicia a «necesidade» de pór en marcha un proxecto que sirva «para abrir Ourense cara o río desde o punto de vista deportivo e turístico». Segundo avanza o goberno municipal, Rosa Quintana e José Juan Durán recibiron con interese a proposta e comprometéronse a analizala. O obxectivo é «articular un proxecto, conxunto co Concello de Ourense, que permita a valorización e dinamización do tramo urbano do río Miño ao seu paso pola cidade das Burgas», di o comunicado difundido polo executivo local para informar da reunión solicitada polo rexedor ourensán.
Unha idea cuxo desenvolvemento está pendente de informes técnicos
A concreción dos traballos que será necesario realizar para facer navegable o tramo urbano do río Miño determinarana os informes técnicos que se elaborarán a partir de agora. Deles tamén dependerá a localización concreta dos pantaláns na canle fluvial así como de todos os servizos que deberían acompañar a esas infraestruturas para facilitar o seu uso por parte de afeccionados ao remo ou ao piragüismo ou por parte dos turistas que visiten a cidade.
Cabe destacar, por outra banda, que esta non é a primeira vez que se pon sobre a mesa un proxecto deste tipo en Ourense. Hai que lembrar que esa foi a principal promesa electoral de Compromiso por Galicia na última campaña das eleccións municipais, celebradas no ano 2015. O candidato desa formación política, Xosé Mosquera, pretendía facer o Miño navegable desde Ponche Vella ata a zona termal de Outariz ou mesmo ata Castrelo de Miño, para así conectar co parque náutico que existe alí. CxG non gañou aquelas eleccións e nin sequera obtivo representación polo que a idea quedou gardada nun caixón.
Por outra banda, desde a Mancomunidade de Santa Águeda púxose en marcha hai uns anos un proxecto para facer navegable o río Miño desde Os Peares ata a presa de Velle con varios puntos de atracada para catamaráns. O obxectivo era ampliar as rutas turísticas que xa existen augas arriba para chegar ás portas da capital ourensá.
Nas eleccións do ano 2015 propúxose facilitar a navegación ata Castrelo de Miño
Un proxecto similar anunciado no 2011 en Xinzo de Limia nunca se chegou a executar
Aínda que Portos de Galicia centra a súa actividade basicamente nas zonas costeiras, esta non é a primeira vez que se especula coa súa participación nun proxecto na provincia de Ourense. No ano 2011 o Concello de Xinzo de Limia chegou a asinar un convenio con esa entidade para pór en marcha un parque náutico na localidade.
Portos de Galicia prevía un investimento de ao redor de 200.000 euros para a construción, no tramo urbano do río Limia, de pantaláns e dun almacén para gardar material de remo ou piragüismo. O entón presidente da entidade portuaria, José Manuel Álvarez-Campá, visitou Xinzo o día 17 de febreiro do ano 2011 -a só unhas semanas das eleccións municipais- para presentar o proxecto publicamente e destacou o seu «gran potencial turístico» para a localidade.
A iniciativa nunca chegou a pórse en marcha e atopouse, ademais, cunha forte oposición de colectivos ecoloxistas. A Sociedade Galega de Historia Natural situouse claramente en contra ao entender que a actuación máis necesaria para esa canle sería pór freo á súa contaminación. Por outra banda, boa parte do ano o río baixa con moi pouco caudal ao seu paso por Xinzo.