O Tribunal Supremo ordena ao CGPJ volver investigar se houbo neglixencia da xuíza no asasinato de Isabel Fuentes no CHUO
OURENSE
O Consello Xeral do Poder Xudicial arquivara a queixa presentada pola familia da vítima, que pedía unha sanción para a instrutora de Verín por non ter dado protección á muller agredida polo seu marido, Aniceto Rodríguez, un mes antes
11 feb 2019 . Actualizado ás 20:59 h.O Tribunal Supremo (TS) estimou o recurso presentado pola familia de Isabel Fuentes -a muller de Verín asasinada no 2015 polo seu marido cando estaba ingresada no CHUO por mor dunha agresión anterior de leste- e o Consello Xeral do Poder Xudicial (CGPJ) terá que volver investigar á xuíza María Victoria Fernández Viforcos, instrutora no xulgado de Verín.
A avogada da familia coñeceu hoxe luns que o pleno do TS estimara o seu recurso, aínda que non o contido da resolución, que se comunicará nos próximos días. A familia de Fuentes mantiña que a xuíza cometeu unha neglixencia pero o CGPJ arquivou a queixa. O TS ordena agora ao Consello que reabra o asunto.
Segundo explicou a letrada Beatriz Seijo, no recurso tiñan dúas liñas de argumentación contra o arquivo. Expuña que o CGPJ non contestou se houbo neglixencia por non celebrar a comparecencia prevista en casos de violencia machista e pedía que se tomase declaración aos policías xudiciais que sospeitaron do marido, Aniceto Rodríguez, desde poucos días despois da primeira agresión na casa matrimonial de Pazos (Verín).
Cando se coñeza o contido da resolución do Tribunal Supremo, saberase se o Consello Xeral de Poder Xudicial debe volver valorar se houbo neglixencia xudicial, ao non establecerse medidas de protección (afastamento) para a vítima, ao non celebrarse a comparecencia procesual que hai en casos de violencia de xénero. O que contestara o CGPJ para arquivar a queixa é que non houbo neglixencia da xuíza ao denegar a intervención do teléfono do sospeitoso, pero a familia non expuña que houbese un fallo nisto senón en non ter celebrado unha vista na que se puidesen ter pedido restrición de visitas ou afastamento do marido. A resolución do TS tamén podería inclinarse por estimar o recurso polo segundo argumento da representante da familia, que pedían ao CGPJ que chamase a declarar aos axentes da Policía Xudicial da Garda Civil para que testemuñasen as dificultades que tiveron para expor á maxistrada as súas sospeitas sobre o marido tras a primeira agresión.
A avogada Beatriz Seijo valoraba que a estimación do recurso recíbena con alegría porque o proceso, desde o 2015 e desde o 2016 co recurso, foi un camiño «longo e complicado». Agarda que a resolución do pleno sente doutrina xeneralista ou xurisprudencia para «facer ben as cousas» no futuro.