A medida trata de favorecer os nacementos nos territorios máis despoboados
28 ene 2019 . Actualizado ás 20:30 h.Os pais dos nenos nados desde o 1 de xaneiro deste ano aínda non puideron solicitar a axuda á natalidade que ofrece a Deputación ourensá. A Junta de Goberno da institución non aprobou ata este luns as bases do coñecido como programa ChegOU e, en canto sexan publicadas no Boletín Oficial da Provincia, os posibles beneficiarios poderán tramitar as súas solicitudes. Ata agora, as axudas eran de 300 euros para todos, pero este ano os pais dos nados en determinados municipios recibirán 500.
A Deputación estrea, deste xeito, un sistema de clasificación para os concellos da provincia creado en base a criterios relacionados coa súa poboación, a súa situación xeográfica, perda de habitantes, densidade demográfica, índice de envellecemento e taxa de natalidade. Tras a recollida e procesado deses datos, resulta que son trece os concellos con máis prioridade.
Trátase de Beade, Os Blancos, Boborás, Calvos de Randín, Chandrexa de Queixa, Gomesende, Larouco, Manzaneda, Montederramo, Porqueira, San Xoán de Río, A Teixeira e Vilariño de Conso. Son todos concellos de menos de mil habitantes que cumpren cunha serie de requisitos como a perda de poboación de máis do 20 % na última década ou a súa baixa densidade de poboación. Alí é onde a axuda sobe a 500 euros. Os pais que teñan fillos este ano e que estean censados nos outros 79 concellos da provincia recibirán 300 euros.
O motivo é a aplicación da chamada «perspectiva de reto demográfico». Desde a conferencia de presidentes autonómicos celebrada no ano 2017 acordouse a posta en marcha dunha estratexia nacional fronte ao despoboamento. «A regresión demográfica converteuse nun problema de Estado e, como tal, é preciso responder a el desde unha perspectiva de gobernanza multinivel que na práctica leva á implicación de todas as Administración públicas en todas as súas frontes de acción», explica a proposta do presidente provincial aprobada este luns en Junta de Goberno.
Nese documento cítase, ademais, o protocolo da comisión sobre despoboamento que ten en marcha a Federación Española de Municipios e Provincias (FEMP), que establece, segundo lembra a proposta, que «as axudas e incentivos á natalidade deberán ter en conta os espazos rurais en canto á súa prioridade demográfica».
Reaccións
A noticia foi ben recibida nos concellos beneficiados por este novo criterio. Un deles é do dos Blancos. O seu alcalde, José Manuel Castro (PP), cre que os seus veciños recibirán con satisfacción o incremento da axuda da Deputación a 500 euros. Alí o Concello dá aos pais 300 euros anuais durante os tres primeiros anos de vida dos seus fillos. «Todo axuda, pero ninguén ten un fillo porque lle vaian dar cincocentos ou mil euros», opina o rexedor.
O seu homólogo en Manzaneda, Félix Domínguez, de Anova, ve a situación de forma similar. Alí dan 900 euros por nacemento. «Todo o que sexa mellorar as axudas para fomentar a natalidade será ben recibido», sinala o rexedor, que inmediatamente engade que «non é a solución». Segundo di, «teríamos que empezar por mellorar as comunicacións do oriente ourensán».