O campenato de Galicia de campo a través para menores, o de Sub-16, o de Sub-18 e o novo cros mixto por substitucións serán as citas no Aguillón
23 ene 2019 . Actualizado ás 20:43 h.A xornada do próximo domingo na Rúa será unha intensa carteleira do cros galego máis notable, coa disputa de ata catro competicións no circuíto do Aguillón, xa recoñecido de modo notorio no panorama autonómico.
A sesión ten calendada a súa primeira carreira ás 10.30 horas, coa disputa do Memorial Alejandro Lorenzo, Campionato de Galicia de Campo a través para menores. Ese primeiro pistoletazo da súa saída será o da categoría sub 10 feminina, á que seguirán os nenos, as dúas categorías sub 12 e as dúas sub 14.
Os pequenos tomarán parte nun circuíto establecido en distancias de 800 a 2.700 metros, segundo a idade e darán paso á segunda convocatoria da xornada, o Campionato de Galicia Sub 16 nos seus formatos individual e por clubs. Outra vez serán as mulleres as que salten primeiro ao circuíto rués, ás 12.05 horas, mentres que os mozos o farán desde as 12.25 horas. Neste caso, os trazados deseñados pola organización da propia Federación Galega de Atletismo van desde os 2.700 metros aos 3.900.
A terceira convocatoria do día é a do autonómico da categoría sub 18, cun formato similar ao previsto para a categoría inferior, xa que as mulleres sairán desde as 12.50 horas e os homes desde as 13.15. A lonxitude da proba vai dos 3.900 metros na primeira carreira aos 4.700 da segunda.
Novidade
Para rematar, a programa pecharase cunha gran innovación, centrada no Campionato de Galicia de Campo a través Mixto por substitucións.
Trátase dunha nova competición na cal poderán inscribirse atletas sub 20 ou de categoría superior. Trátase de equipos mixtos compostos por dous homes e dúas mulleres, aínda que como máximo só se poderá incluír a un deportista estranxeiro e tamén a só un dun club filial. A orde de saída establecido será obrigatorio, axustándose á secuencia muller, home, muller, home e cada relevista dará unha volta ao circuíto grande do Aguillón, ata completar 7.800 metros.
Os cuartetos inscritos sairán ás 13.45 horas e a orde de colocación dos equipos determinarase por sorteo.