Os nacionalistas din que Ourense non debe conformarse con «proxectos descafeinados»
23 ene 2019 . Actualizado ás 08:17 h.O proxecto previsto para a estación intermodal debe ser paralizado para elaborar un novo. Esa é a posición do BNG respecto da infraestrutura que este martes defenderon en rolda de prensa a súa deputada autonómica, Noa Presas, e o responsable local do partido, que tamén será o candidato nacionalista á alcaldía nas próximas eleccións, Luis Seara.
«O que está a acontecer coa estación intermodal é o enésimo exemplo de para que valen as forzas políticas de ámbito estatal que operan no concello e que intereses defenden», din os nacionalistas. Neste sentido, lembran que o PP defendeu o soterramento das vías só cando estaba na oposición e que o PSOE local abandonou a súa reivindicación do deseño inicial de Norman Foster tras recuperar o poder en Madrid. «Dependendo de se están no Goberno ou na oposición o discurso pode ser un ou o contrario sen tan sequera ruborizarse», conclúen no BNG.
Ademais de defender a paralización e reelaboración do proxecto actual no pleno da Deputación -o Bloque non ten representación no Concello de Ourense- os nacionalistas puxeron en marcha unha campaña informativa dirixida aos veciños da cidade «para que quede meridianamente claro de quen é a responsabilidade de que vaiamos ter unha estación de cuarta». Esta iniciativa fará especial fincapé no barrio da Ponte porque, segundo precisan desde o BNG, os residentes alí sufrirán as consecuencias «nas súas propias carnes».
«Mentres noutros territorios do Estado, a sociedade civil e o goberno municipal avanzan da man, demandando infraestruturas dignas, aquí tragamos con proxectos descafeinados. Ourense non pode perder o tren e desaproveitar unha oportunidade histórica para construír unha infraestrutura que sexa verdadeiramente intermodal e nos sitúe na senda da modernidade», conclúen os nacionalistas.