Xinzo Adiante reclama que se convoque un certame público para designar ao gañador por votación popular
12 dic 2018 . Actualizado ás 18:59 h.A decisión da comisión do entroido de Xinzo de adxudicar o deseño dos carteis das festas do entroido de 2018 e 2019 sen concurso público, como era tradicional, provocou o malestar do grupo Xinzo Adiante. O seu portavoz, Manuel Pérez Campos, considerou que «é un sinsentido adxudicar un ano antes o gañador do 2019. Non sabíamos nada. Hai meses se nos dixo que non se convocou o certame en 2018 para encargar un deseño de calidade, dacordo coa pretensión de reforzar a candidatura do carnaval como festa de interés turístico internacional».
«Tampouco e lóxico encarecer o custe do cartel de 500 euros, como cando se facía por votación popular, a 850. Cremos que se debería volver a convocar o certamen no futuro e non nos parece de recibo esta decisión, que non foi consultada coa oposición», remarcou.
Pérez tamén censurou a decisión do goberno local de contratar catro carrozas foráneas por un importe total de 4.800 euros para o desfile do Martes de 2018. «Deberíase incentivar ou sufragar con algunha aportación as carrozas locais», reflectiu.