O implicado nega os feitos, polo que o seu defensor pediu a libre absolución
16 jun 2018 . Actualizado ás 05:00 h.Con diferentes versións como ofreceron a vítima e o acusado dunha agresión sexual con violencia e intimidación, será a Audiencia Provincial a que valore testemuños e informes periciais para determinar se condena ou absolve a Arturo F. P. duns feitos ocorridos na madrugada do 2 de febreiro do 2017. Desde entón está privado de liberdade o acusado, a quen a vítima, á parte de agresión sexual e lesións, engade un terceiro delito de ameazas. Pide, en total, dezaseis anos de prisión, seis máis da solicitude de pena que formulou a representante da fiscalía.
A vista, que se desenvolveu en sesións celebradas o xoves e o venres, desenvolveuse a porta pechada, a petición da acusación particular. Tanto o ministerio fiscal como a prexudicada e a defensa mantiveron a súa posición, sen ter introducido variación algunha como consecuencia das declaracións das testemuñas e as achegas introducidas polos forenses.
O acusado, de acordo coa versión que ofrecen as acusacións, insistiu en acompañar a unha muller a pesar de que ela lle deixou claro que non o desexaba. Mantén a denunciante que o acusado se propasó con ela, que a sobou, tirouna ao chan, tirouna ao chan e penetrouna vaginalmente, aínda que, ao parecer, non quedou claro se esa manobra a fixo cos dedos. O escrito de acusación indica, ademais, que o acusado intentou que ela non berrase e por iso meteulle os dedos na boca. A alerta do suceso habíaa dado un condutor que escoitou os berros de axuda da vítima.