Teño unha noticia boa e outra mala. Empezo pola primeira. Resumindo moitísimo, o 1 de xuño estreamos unha nova factura da luz que premiará a disciplina nos hábitos, xa que implantará a modalidade de discriminación horaria. Así que se conseguimos concentrar os consumos o máximo posible en certas horas e días -sobre todo, de doce da noite a oito da mañá e sábados, domingos e festivos enteritos- veremos como se desinfla o gasto en luz. A mala noticia é que se nos despistamos e relaxamos hábitos, o golpe pode ser monumental. Especialmente se os consumos principais se efectúan de 10 a 12 horas e de 18 a 22 horas. Ollo a este último tramo, é cando as familias regresan a casa, ponse a facer a cea e a gozar dos últimos momentos de lecer do día. Neses intervalos, o prezo da electricidade custará ata tres veces máis que na actualidade.
Como se ve, a nova factura ten a súa parte moi boa, pero tamén un lado escuro que pode resultar desastroso para a economía familiar. Porque, quen se pon a mirar o reloxo para acender o forno ou pór a secadora? Pois haberá que facelo. Este novo modelo deixa en mans do consumidor pagar máis ou menos pola luz en función de se consome nunhas horas ou noutras. A idea parece boa, pero talvez non fose desatinado empezar a aplicala ou de forma máis paulatina ou ampliando, para empezar, o período de horas máis baratas do día.
Porque este modelo talvez é aínda demasiado moderno. Está pensado para unha sociedade inmersa no autoconsumo fotovoltaico (os paneis fornecerán electricidade durante as horas caras do día e así non haberá que comprala) e o vehículo eléctrico (para recargalo de noite). E iso vai, pero a pasito de tartaruga. A nova factura tamén debería facelo. Porque o cidadán debe ir habituándose aos poucos a consumir doutro xeito.
Tampouco se asusten. Só lean con detemento a información que lles deberá remitir a súa compaña eléctrica en cuestión de semanas e a planificar. O resultado pode ser moi vantaxoso.