Este 2020 está sendo o ano de Corea (do Sur), país que marca tendencia en todas as frontes: arrasou nos Óscar con Parásitos , demostrou ao mundo como se podía controlar o covid-19 cunha combinación de tecnoloxía e medidas proporcionadas (non se prohibiu en ningún momento á xente saír á rúa como en España ou Italia), os seus fabricantes de automóbiles atópanse entre os máis avanzados nos plans de electrificación, e Samsung e LG lideran os mercados de televisores e teléfonos intelixentes. Ata unha marca deportiva de orixe italiana como Fila volveu a pórse de moda tras a súa adquisición pola súa filial coreana no 2007.
No marco da feira de electrónica IFA, que se celebra estes días en Berlín cun sistema mixto presencial e online, Samsung presentou varios dispositivos. Wireless Charging Trio é unha base inalámbrica que permite cargar tres aparellos ao mesmo tempo: un móbil, un smartwatch e uns auriculares Bluetooth. A idea xa fora proposta por Apple fai tres anos, pero aquel proxecto —denominado AirPower— foi cancelado debido a que, segundo explicaron, non acadaba os «altos estándares» da compaña da mazá.
Galaxy Fit 2 é unha nova pulseira cuantificadora moi lixeira (11,9 gramos), con pantalla AMOLED, sumergible e ata 21 días de autonomía. Monitoriza o ritmo cardíaco e o soño, e é capaz de detectar e rexistrar ata cinco tipos diferentes de exercicios.
The Premiere é un proxector 4K de tiro curto (pódese colocar debaixo da superficie de proxección) que ofrece diagonais de 120 ou 130 polgadas, impensables en pantallas convencionais. Ten certificación HDR10+, acada os 2.800 lúmenes e admite o Filmmaker Mode: unha tecnoloxía impulsada por Christopher Nolan, Martin Scorsese e James Cameron que desactiva todo o postprocesado de vídeo en series e películas para preservar exactamente a visión orixinal do director.