Hai moitos anos fun de viaxe a María a Gorda, na costa oeste de Cuba , para mergullar, e recentemente chegado contáronme que poucos días antes un monitor habíase mergullado demasiado e a borracheira que lle produciu a narcosis do nitróxeno levouno eufórico ás profundidades, desaparecendo para sempre. As botellas, os chumbos, impedirían que o seu corpo volvese nunca máis á superficie.
Acórdome agora daquela historia ao ver ao Deportivo nas simas da táboa e porque me advirte un amigo impresor de Salamanca -a min, que non sei nada de fútbol- que teñamos coidado con baixar a segunda B, porque acadadas certas profundidades xa non se pode volver. E como parece que o di por experiencia, eu advírtoo aquí por se serve de algo. O que si se do fútbol son os estupendos relatos de Ignacio Aldecoa ?en Contos republicanos- e as crónicas de Wenceslao Fernández Flórez -De portería a portería- ou as do poeta Antonio Hernández -A marcha verde- sobre a súa Betis. E a Divina Comedia, claro. Alí cando o Dante chega ás portas do inferno tópase coa famosa frase que advirte a pecadores: «Abandonade toda esperanza vós que aquí entrades». O poeta italiano falaba por suposto de segunda B. Pero aqueles que desesperan como Segismundo, que pensen que xunto á súa miseria florecen, como camelias, outras flores de inverno. E que a miña se chama Deportivo Liceo, é un equipo de hockey e encabeza xunto ao Barcelona a división de honra. E os seus seguidores gozamos como ananos.