O pónei de Santiago Abascal

Laureano López
Laureano López CAMPO DE BATALLA

OPINIÓN

11 feb 2019 . Actualizado ás 05:00 h.

Se unha soa palabra -relator- pode arruinar as expectativas dun Goberno, e outra -felón- as do principal partido da oposición, quen sabe as consecuencias que poidan ter os verbos máis ou menos grosos que se pronuncien de aquí ao 26 de maio. O futuro, pois, non existe, pero o que sucedería, de ir hoxe as urnas, está na enquisa de Sondaxe. Aí pódese ver que Galicia non é Andalucía e que se Santiago Abascal finalmente entra por Pedrafita farao montado nun pónei, non nun cabalo. Pouco ou nada, afortunadamente para case todos e todas, vai a «reconquistar» por estas lareiras. O cal demostra que hai fórmulas para conter a Vox máis aló das postas en marcha por Pablo Casado, aínda que el non as vexa, ultra-obsesionado como está con deixar de ser a «derechita covarde». Se Abascal chega a lombos dun pónei, Cidadáns faino subido a un burro, probablemente grazas ás opinións tan Rosa Díez de Toni Cantó, e ao interese máis ben despreciable de Albert Rivera por Galicia. Esta enquisa deixa tamén unha mensaxe a Pedro Sánchez, e iso que non se recolle, por ser tan recente, o seu harakiri interruptus -el verá se quere enganarse a si mesmo co plusmarquista Abel Caballero-; e para Pablo Iglesias e a súa confundida marea. Quen lles ía dicir a eles, tan novos, que calquera tempo pasado foi mellor. Tamén hai recados para o BNG -Lores non vai durar toda a vida- e para Feijoo, ao que sistematicamente dan as costas as cidades: os seus emisarios case sempre acaban confortablemente aposentados na irrelevancia política.