O maltreito euro leva desde o 2011 a firma de Mario Draghi. Se aínda ten algún billete de euro na súa carteira, aí pódeo ver. Pero quen está detrás desa letra miúda? Un home empeñado en salvar a moeda única á fronte do Banco Central Europeo. Draghi case non concede entrevistas, pero hai pouco puidemos ler algúns detalles sobre a persoa que fai equilibrios para que non caiamos no foso da deflación e para que non nos mate tampouco a hipertensión da inflación. Case un milagre nunha Europa cuxos dirixentes falan o mítico politiqués, que todo o enreda e que só entenden eles. É Mario Draghi, a tenor da reportaxe aparecida, home tranquilo. Amante do deporte (xogou ao baloncesto na súa etapa escolar e agora corre e xoga ao golf), segue coa súa noiva de toda a vida, unha especialista en literatura. Pero, a pesar de que quedou ao mando de dous irmáns moi novo (perdeu ao seu pai con 15 anos e á súa nai pouco despois), a Mario deulle tempo a coñecer dous ensinos do seu pai que nunca esquecería. A primeira: «Fillo, ante a adversidade, valor». E a segunda contoulla tras unha visita a Alemaña: «Había un monumento cunha inscrición que dicía máis ou menos o seguinte: se perdiches diñeiro, non perdiches nada, podes intentar recuperalo cun negocio. Se perdiches a honra, perdiches moito, pero podes recuperalo mediante un acto heroico. Se perdiches a coraxe, perdíchelo todo». As dúas serven para subliñar o carácter de Súper Mario que está a facer que Draghi aguante como cabeza dunha institución que os alemáns teñen atravesada. Tamén lle contemplan 18 horas de traballo ao día. Un italiano que está feito de aceiro, non da madeira coa que Collodi construíu o mítico Pinocho.