Unha empresa danesa crea reloxos a partir das pezas do mítico modelo de Ford achadas en despezamentos
17 dic 2017 . Actualizado ás 13:48 h.Podería ser o agasallo definitivo para o fanático do motor da familia: un reloxo fabricado a man, composto con mimo a partir de materiais que noutra vida foron parte de Ford Mustang clásicos. A idea naceu de Christian Mygh e Jonathan Kamstrump, que visitan xuntos despezamentos de todo o mundo buscando Mustangs que poidan ser transformados en reloxos únicos, con prezos a partir de 1.200 euros.
Para o verdadeiro entusiasta de Mustang, REC Watches, con sede en Dinamarca, mesmo creará un novo reloxo a partir de pezas doadas polos seus propietarios, incluído o campión do mundo de drift Vaugh Gittin Jr., que leva na súa boneca un reloxo con caixa de fibra de carbono proveniente do Ford Mustang RTR de 700 cabalos co que competiu nas World Drift Series.
«A maioría de xente só ve unha chea de metal, a pantasma dun Mustang. Nós vemos algo completamente diferente, a alma dun coche e unha historia que necesita ser contada», conta o cofundador de REC Watches Christian Mygh. «Non estou a despezar Mustangs. Estou a devolver á vida en forma de reloxo Mustangs que están máis aló de toda reparación», engade.
Para garantir que se sigan contando estas historias, REC Watches rastrexa meticulosamente o pasado de cada vehículo, falando cos anteriores propietarios, recompilando anécdotas e imaxes de anteriores etapas do vehículo e incorporándoas a un vídeo personalizado.
Cada deseño de reloxo incorpora o número de identificación do vehículo, o ano de produción e detalles de deseño clásico Mustang. Unha agulla deseñada para asemellarse a un contador de combustible mostra o nivel de batería do reloxo, e as manecillas, data e números están todos influídos pola estética do cadro de mandos do icónico modelo. Nunha viaxe a Suecia, o equipo atopou un modelo moi pouco habitual, un Raven Black de 1966 que se converteu en base para a súa colección P51-04, limitada a 250 unidades.
O agresivo e radical deseño do Mustang, bautizado en honra a un caza de combate da Segunda Guerra Mundial e lanzado en 1964, converteu a este coche nun clásico instantáneo. O seu status de superestrella creceu a partir do seu papel protagonista no clásico do cine de acción Bullitt, xunto a Steve McQueen, así como de toda unha serie de cancións e películas que contaron coa participación deste revolucionario modelo. O Ford Mustang actual mantén viva esa emoción coas elevadas prestacións dos motores V8 5.0 litros de 450 CV e EcoBoost 2.3 litros de 290 CV.