A decisión adóptase despois de que Londres admitise un novo caso de enfermidade das vacas tolas
17 oct 2021 . Actualizado ás 05:00 h.China deu un mazazo aos gandeiros británicos ao prohibir as importacións de carne de vacún do Reino Unido. A decisión adoptouse despois de que Londres admitise un novo caso de encefalitis bovina- máis coñecida como a enfermidade das vacas tolas- nunha das súas granxas. O anuncio supón un xerro de auga fría para os produtores, que no 2018 lograron que China levantase o veto que a finais dos 90 impuxo á súa carne. Agora agardaban vender ao xigante asiático uns 300 millóns de euros nos próximos anos. A prohibición ameaza con danar máis as relacións bilaterais, que quedaron tocadas despois de que en 2019 Londres sacase á chinesa Huawei do proxecto para instalar a rede 5G de telefonía móbil.