En pleno desenvolvemento do seu proxecto persoal en Madrid e en plena pandemia, este profesional fixo as maletas de volta a Galicia. A súa empresa lévache o fisio a casa e de forma personalizada
14 feb 2021 . Actualizado ás 05:00 h.Trato próximo, sesións personalizadas, constante seguimento e a comodidade de non ter que saír da casa. Esas son só algunhas das bases dun modelo de atención pouco coñecido en Galicia co que un fisioterapeuta de Gondomar desembarcaba fai só uns meses na área de Vigo. O nome do seu proxecto, Fisiodomus. A fórmula parece sinxela, pero permite un maior apego entre o paciente e o seu fisioterapeuta. «Este servizo vese aquí como algo exclusivo ou como unha necesidade para persoas con mobilidade reducida, cando realmente non é así. En xeral, os pacientes repiten porque ven moitas vantaxes na terapia e o seguimento». Así o explica a alma e o cerebro de Fisiodomus, Pablo Quintela, un profesional en constante formación con experiencia tanto en clínicas como en hospitais. «Cando decidimos trasladarnos a Vigo daba un pouco de vertixe porque levabamos ano e medio en Madrid co proxecto. Tiñamos xa unha carteira de clientes considerable e houbo que empezar de cero. En Madrid falamos dun servizo moi estendido e creo que en Galicia vai ser igual», explica tras a boa acollida do seu proxecto empresarial e de saúde.
Fisiodomus ofrece sesións de fisioterapia a domicilio dunha hora. Este profesional desprázase á casa ou á empresa do paciente «para facer que a terapia sexa o máis cómoda posible»: «Ofrecemos un trato próximo. Os pacientes contactan comigo, chámanme ou me escriben, e envíolles exercicios ou lles fago un tratamento postsesión. Gústame acompañarlles durante todo o proceso de rehabilitación coñecendo a súa contorna e a súa día a día, que moitas veces é o que me faltaba nunha clínica. Vexo directamente os hábitos, incluso os malos, e iso fai que moitas veces poida dar pautas que corrixan ou eviten lesións ou doenzas», explica Pablo Quintela sobre un servizo feito á súa medida e concibido como unha iniciativa persoal que non descarta que poida crecer a medio prazo. «As tarifas son moi competitivas. Loxicamente hai un desprazamento pola miña banda, pero non hai moita diferenza con respecto ao tratamento nunha clínica. Ademais, hai que ter en conta que se trata dunha atención moi personalizada. En realidade é trasladar a clínica ao fogar dos pacientes. Levo a padiola e as miñas mans, que son o máis importante. Tamén levo material para outras técnicas que utilizo, como vendaxes funcionais ou agullas de punción seca. Sempre tiven material desechable, pero agora co covid-19 reforzamos aínda máis a protección para ter a máxima seguridade nas sesións».
Á medida do paciente
En todo isto, o boca a boca funciónalle moi ben a este tipo de empresa. Tamén o constante traballo para ter presenza dixital a través das procuras, a súa propia páxina web e o seu perfil en Instagram onde mostran a actividade da empresa e achegan consellos co obxectivo de axudar a mellorar a calidade de vida dos usuarios. «Para min como profesional, o máis positivo é que o trato co paciente é máis próximo, séntense máis cómodos, e a posibilidade de que contacten comigo de forma directa axuda moito a ambas as partes e achega seguridade. Noto que valoran non ter que desprazarse e o cómodo que é iso. Ao final, demandas un servizo sanitario e telo na túa casa. Cando falamos de saúde, isto é moi importante. Por outra banda, axuda moito que poidan chamarche ou escribirche se o necesitan», asegura.
Deste xeito, os pacientes non só poden acceder a sesións específicas por un problema concreto, senón acceder a un seguimento igual ao dunha clínica convencional. «Gran parte dos meus pacientes necesitan fisioterapia de forma regular. O que fixemos foi ofrecerlle bonos a este tipo de persoas. Coa padiola e un espazo para facer exercicios é suficiente para facer unha sesión efectiva. Un punto a favor é que, en xeral, na zona de Vigo as vivendas son máis grandes e resulta máis cómodo traballar», explica facendo referencia á súa etapa en Madrid, onde ademais as distancias entre domicilios complicaban moito máis a axenda. «Os pacientes contactan por teléfono ou por Whatsapp. Ao final, aínda que podemos dicir que o contacto inicial é online e o servizo offline, algúns pacientes coñécennos a través da web, pero adoitan chamar por teléfono».
Todo iso, en plena pandemia e coas dúbidas que a situación que afloraban ante esta situación: «Non se como fose todo sen pandemia, pero si é certo que me atopo con máis problemas de costas derivados do teletrabajo. Outra chamada frecuente é a de persoas maiores que perderon mobilidade. Os seus familiares dinme que ‘pegaron un bajón'».