O fondo de capital risco Kfund investirá un mínimo de dous millóns en «startups» da comunidade co capital achegado por Xesgalicia
16 oct 2020 . Actualizado ás 12:37 h.A súa carta de presentación non pode ser máis atractiva. Son un dos fondos de capital risco de referencia a nivel nacional. Invisten en empresas e emprendedores e, nesta ocasión, co foco posto nas ideas galegas. Kfund, a compaña liderada por nomes tan coñecidos no ecosistema emprendedor como Carina Szpilka ou Iñaki Arrola, puña en marcha este verán o seu segundo fondo para startups tecnolóxicas. Son 70 millóns de euros para as mellores ideas, as máis innovadoras. A particularidade neste caso é o nivel de investimento que se destinou á comunidade galega. E é que, a través de Xesgalicia , vanse canalizar dous millóns de euros para as startups da terra. «Esa é a cantidade mínima. Todo dependerá da evolución e das ideas chulas que atopemos», di o galego Jaime Novoa, que forma parte do equipo de Kfund desde fai máis de catro anos.
Ademais de Xesgalicia, neses 70 millóns de euros hai máis entidades. Desde o Fondo Europeo de Investimentos ou o ICO, ata directivos de empresas ou fundadores de startups . «Creo que é moi boa noticia para Galicia porque a mensaxe que queremos transmitir é ‘oe, se es unha startup de aquí, fala connosco porque hai diñeiro. Varios millóns de euros para investir na comunidade. Saben que existe capital e que poden conseguilo. Tamén é un incentivo para aqueles galegos que están fóra, en Madrid, Barcelona ou Londres, e que queiran volver. Hai capital dispoñible», remarca Jaime Novoa.
Kfund avanza así no seu segundo fondo, tras o primeiro de 50 millóns distribuídos en 28 empresas, entre elas as galegas Arengu e Appentra. «Somos un fondo agnóstico. Investimos tanto en compañas que venden a outras empresas (B2B) como ao consumidor final (B2C). Tampouco nos fixamos nun sector en concreto. Sentímonos cómodos investindo en empresas pre-seed e seed, cando estas empezan a dar os seus primeiros pasos tanto a nivel de produto como no ámbito comercial, e creemos que contamos cos recursos necesarios para involucrarnos no desenvolvemento das mesmas e axudar no que poidamos REVISAR».
Arrinca polo tanto unha carreira de fondo de dez anos — a primeira metade de investimento e de construción de carteira e a segunda de desinversión— nos que se van pór sobre a mesa para cada compaña entre 100.000 euros e dous millóns «co obxectivo de adquirir participacións minoritarias e de axudar ao desenvolvemento de empresas tecnolóxicas de escala global», explica Novoa. «Nesta situación do covid, creemos que as oportunidades de investimento crecerán en toda a Península e que Galicia reúne as características para xerar oportunidades relevantes no ámbito tecnolóxico», sentenza.
