Superou o 100 % do Produto Interior Bruto debido á crise do covid-19
28 jun 2020 . Actualizado ás 05:00 h.Por primeira vez desde 1963, a débeda pública británica é máis grande que a economía do país. Segundo a Oficina Nacional de Estatísticas (ONS), en abril acadou a cifra de 1,95 billóns de libras (2,15 billóns de euros), o cal equivale ao 100,9 % do Produto Interior Bruto (PIB). Só en maio, o Goberno de Boris Johnson tivo que emitir débeda por 55.000 millóns de libras (60.860 millóns de euros) para axudar ás empresas e aos cidadáns a enfrontarse á crise provocada polo coronavirus. O Reino Unido súmase así a Estados Unidos e Xapón dentro do club de grandes potencias cuxos niveis de débeda superan ao que producen as súas economías nun ano. As análises apuntan a que o ano que vén podería acadar o 105 ou o 110 % do PIB.