O porto coruñés concentra o 70 % do mercado galego e lidera a cornixa cántabro-atlántica con máis de 2 millóns de toneladas anuais O cereal que entra por Langosteira alimenta á maior parte da gandería galega
26 novs 2019 . Actualizado ás 20:10 h.O porto exterior da Coruña consolidouse como o gran centro loxístico de movemento de cereais en Galicia. As cifras falan e, grazas ao traslado e implantación dos principais operadores deste sector en Punta Langosteira, mellorando así os seus procesos e concentrando a súa capacidade de almacenamento, o porto da Coruña é xa o primeiro da cornixa cántabro-atlántica en importación de graneis agroalimentarios.
Polo que xa constitúe «o gran celeiro de Galicia» móvense cada ano unha media de dous millóns de toneladas de cereais, o que supón o 70 % do mercado na comunidade, e o 40 % do total de tráficos en toda a cornixa norte, superado a portos como Marín, Bilbao ou Pasaxes.
Aposta firme
Os grandes operadores do sector, como son Terminais Marítimos de Galicia, Galigrain ou Pérez Torres Marítima, apostaron firmemente por Punta Langosteira desde o inicio do plan de traslado e están recollendo os froitos. Foron os primeiros en construír as súas grandes naves de xestión e almacenamento fronte á gran chaira de operacións do porto exterior, e actualmente suman xa 100.000 metros cadrados de espazo para provisión das súas mercancías. Ademais, incorporaron medios mecánicos e técnicos de última xeración e os máximos estándares en control ambiental, o que permitiu incrementar a eficiencia e a seguridade na súa actividade.
As vantaxes competitivas que ofrece o porto exterior son unha garantía de crecemento para estes clientes, que poden beneficiarse dos grandes calados nos accesos e a lámina de auga protexida de Langosteira, a superficie loxística que permite amorear grandes fluxos de mercancía ou a localización do recinto, afastada de núcleos habitados, o que evita situacións de impacto ambiental ou molestias para os residentes. Factores que están a contribuír a consolidar a posición do porto da Coruña como o gran hub de cereais de Galicia, con especial incidencia nas provincias da Coruña e Lugo, e en xeral en todo o noroeste español, estendéndose a Castela e León, onde o sector agroalimentario ten unha enorme forza.
A Autoridade Portuaria da Coruña incorporou activos que suman eficiencia, como a posta en marcha do Punto de Inspección Fronteiriza, PIF, con instalacións punteiras que permiten axilizar e garantir a precisión no control de calidade dos produtos que chegan ao porto exterior. Ademais, o organismo público estableceu unha canle de coordinación permanente con Agafac, a Asociación Galega de Fabricantes de Alimentos Compostos, que aglutina á inmensa maioría das empresas produtoras de alimentación animal, en torno ao 85 % do total. As materias primas para elaborar estes produtos chegan a Galicia a través de buques que descargan no porto exterior. É dicir, que practicamente todas as vacas ou os pitos galegos aliméntanse de cereais que chegan a través do porto da Coruña. Os que suman maior volume de tráfico son o millo, a cebada, o trigo ou as fariñas. Grazas ás sinerxías acadadas pola autoridade portuaria e Agafac, asociación que desenvolve un importante labor para manter a cadea de calidade no proceso de produción e distribución dos produtos de alimentación animal, garantiuse que esta mercancía se transforme en produtos alimentarios seguindo os máximos estándares e chegue nas mellores condicións ás granxas de toda Galicia.
A ligazón ferroviaria, unha infraestrutura irrenunciable para lograr a plena operatividade
O incremento de tráficos é constante no porto exterior da Coruña, que suma xa máis de 9 millóns de toneladas de mercancía desde a súa posta en servizo en setembro do 2012. Son 900 os buques que operaron nos peiraos de Langosteira, en moitos casos de xeito simultáneo, con operacións de distinta complexidade e demostrando o bo comportamento da dársena en todo tipo de condicións meteorolóxicas. Ademais, durante este período hanse xerado tráficos novos, que se implantaron en Langosteira e que nunca tiveran presenza na Coruña, como o clínker, a bauxita ou o zinc, entre outros.
En relación co avance nas liñas de negocio, a autoridade portuaria mantén os contactos permanentes con potenciais investidores e clientes, mentres se desenvolven as obras necesarias para dar un novo paso fundamental: a chegada dos graneis líquidos a Langosteira. Será unha vez que conclúa a execución do pantalán de Repsol, que trasladará en principio o movemento de petróleo cru, en cumprimento do acordo acadado coa Autoridade Portuaria da Coruña.
Petición unánime
O porto exterior camiña xa que logo cara á máxima operatividade, un proceso no que resulta imprescindible a execución do acceso ferroviario. Tanto a autoridade portuaria como todas as forzas políticas, e os principais axentes económicos e sociais da Coruña, xa mostraron a súa postura en relación coa necesidade de desbloquear este proxecto. Agardan que se cumpra o compromiso acadado de desenvolver a obra con cargo a fondos estatais, e que o novo Goberno que se forme en España aborde esta cuestión como unha prioridade en materia de infraestruturas.
O tren é imprescindible en Langosteira, xa que, aínda que deixou de funcionar para o traslado de carbón da central de Meirama, é a vía de transporte doutras moitas mercancías con presenza no porto da Coruña e un gran potencial de futuro, como bioetanol, cereais e outros graneis sólidos e mercancías xerais. É difícil abordar unha estratexia de crecemento sen esta infraestrutura, que non só permitirá ampliar o radio de acción do porto da Coruña e captar novos investidores e clientes, senón que constitúe tamén o medio de transporte de mercancías máis barato, sostible, ecolóxico e eficiente, esencial para lograr unhas infraestruturas plenamente competitivas.