Líderes en España, México e Colombia, cada vez son máis os curiosos que entran a merodear polos armarios alleos de Chicfy. Con máis de 13 millóns de pezas dispoñibles na súa web, non deixan de unir a compradores e vendedores que buscan «artigos que están esgotados nas tendas» ou mesmo pezas únicas de coleccionista», como recoñece o CMO da empresa, Giovanni Allegrezza.
Nun sector marcado polo fast fashion, é dicir, a creación por parte das marcas de coleccións moi fugaces que dá lugar a un consumo máis rápido de moda, esta web ve na segunda man unha forma de «dar unha segunda vida á túa roupa e contrastar os efectos negativos desta forma de consumir». Entre os seus usuarios máis frecuentes están os de perfil principalmente xuvenil, con «especial interese na moda e o coidado persoal», comenta Alegrezza, o que motiva ao portal a establecer acordos publicitarios con influencers e a basear parte da súa estratexia publicitaria en redes sociais.
O que máis valoran os compradores é, por suposto, «poder atopar primeiras marcas a un prezo máis económico», aínda que tamén aprecian o feito de «poder adquirir novas pezas sen contaminar, nin destruír materias primas, permitíndolle cambiar de look conservando o ecosistema», como alega o CMO.
Os vendedores tamén sacan unha boa tallada con este bum da segunda man, e é que, segundo Allegrezza, algúns usuarios «conseguiron gañar unha media de 1.000 euros ao mes» na web. Tanta é a febre pola reciclaxe e o aforro que ata «unha moza se comprou o vestido, os zapatos e o tocado da súa voda na aplicación», conclúe.