Cada vez hai máis avogados que se especializan en delitos informáticos, pero poucos que se dediquen a iso de forma diaria. É o caso de Luis Xurado. «A demanda é cada vez maior por parte das empresas, pero tamén por parte doutros avogados. Recorren a nós para entender estas situacións e dar unha mellor resposta aos seus clientes».
No seu despacho da Coruña repítense frases como «sempre traballamos así» ou «eu disto non sei». «Se despois ocorre un ataque informático, vénlles un baño de realidade que pode facer perigar a estabilidade do seu negocio. Só os empresarios máis hábiles deciden adiantarse e pór o parche antes de que algo suceda».
A estafa levada á rede é a protagonista dos principais casos que xestionan. «Desde o phishing masivo, facéndose pasar por correos de bancos ou aseguradoras, ata ataques dirixidos a altos cargos da organización. O ramsonware, no que un malware cifra todos os teus arquivos e pode paralizar unha empresa, tamén é habitual. Os delincuentes usan a pouca formación ou o descoido das persoas dentro da organización para efectuar con éxito o ataque». A todo isto hai que sumarlle o roubo de información. Tamén moi habitual. Ante estes casos, os avogados trazan unha estratexia para poder expor o problema xurídico con éxito. «Contamos con colaboradores especializados en resposta ante estes incidentes. Sumando todo, elabórase a documentación para presentar no xulgado. Os xuíces, fiscais e forzas de seguridade do Estado valórana de forma positiva. Axudamos a traducir e comprender a linguaxe técnica. Pasalo a linguaxe xurídica», explica Luis Xurado, que di non poder valorar o número de resolucións destes delitos na actualidade «polo medo das empresas e particulares a denunciar os ataques sufridos». E a todo isto hai que sumala a inmensidade e o anonimato de Internet. «Sen dúbida, a rede facilita moito a comisión de delitos: por exemplo, a velocidade para transferir as cantidades roubadas dun lugar a outro. Un estafador pode cometer de forma simultánea moitos ataques. Cada vítima pode estar nun país distinto. Se lle sumamos a distinta lexislación a nivel mundial, os ataques que teñen éxito, comparado coas consecuencias penais para o atacante, fai que lles compense excesivamente», sentenza Luis Xurado.
Empresas e outros despachos acoden a este tipo de especialistas