Releyeble converte calquera cámara nun sensor intelixente con tecnoloxía de análise facial: mide as características do cliente, as súas reaccións e emocións
02 dic 2018 . Actualizado ás 05:12 h.A cara -xa o garante o refraneiro- é o espello da alma, tamén da do cliente. E que maior anhelo para o empresario que coñecer exactamente que lle gusta e que non ao seu consumidor máis cotizado, ao que directamente dirixe o seu servizo ou ben. Sabedores do poderosa que resultaría esta información, Elisardo González Agulla, Manuel Ubeira Rego e José Luis Alba Castro -os tres galegos, os tres enxeñeiros de Comunicacións pola Universidade de Vigo- desenvolveron unha tecnoloxía capaz de medir o impacto dos anuncios proxectados en pantallas analizando a imaxe das persoas que, ao pasar por diante, detiñan a mirada neles.
Era o verán do 2013. Unha startup de Nova York que creara un sistema similar deu por casualidade coas súas demostracións e, impresionada pola velocidade e a precisión da súa ferramenta, púxolles sobre a mesa unha oferta. «Iso fíxonos pensar que talvez era o momento de montar unha spin-off universitaria e comandar nós mesmos a viaxe do laboratorio ao mercado co obxectivo de converter calquera cámara nun sensor intelixente», relata González Agulla.
A idea convenceu enseguida aos seleccionadores de VíaGalicia, e nada máis rematar o seu período de formación na aceleradora da Zona Franca de Vigo e a Xunta, os mozos de Releyeble engancharon directamente coa de Telefónica, Open Future, onde depuraron o seu modelo de negocio e lanzaron a cana a futuros clientes. Tras anos despois daquela poxa que lles fixo espabilar, nacía oficialmente no 2016 esta startup capaz de saber quen sorrí ante un escaparate e quen pasa de longo, cal é o perfil do que se detén e cantos minutos pasa fronte a un anuncio.
Coas súas solucións, explican desde Pontevedra, pódense facer basicamente dúas cousas: mostrar a mensaxe adecuada a cada audiencia e coñecer mellor ao clientes. «A nosa tecnoloxía de medición solicita información anónima e segmentada (o sexo e a idade), que se pode utilizar de forma agregada para extraer conclusións sobre o impacto dunha determinada campaña publicitaria ou de anuncio específico, ou sacar estatísticas de visitas en feiras ou tendas físicas». No caso da cartelería dixital -pantallas con vídeos ou imaxes-, permite dar no cravo: mostrar a publicidade máis atractiva para a persoa que nese momento está xusto diante do monitor. Poñen exemplos: «Non parece rendible proxectar nunha pantalla un anuncio de deterxente cando quen está fronte a ela é un grupo de adolescentes, neste caso sería mellor un anuncio do último smartphone; este non tería moito sentido se quen estivese diante fose unha parella de máis de 70 anos, para a que sería de maior interese que lle ofrecesen un cruceiro relaxado». «Do mesmo xeito -continúan- os cerebros das mensaxes publicitarias están interesados en comprobar, por exemplo, se unha campaña destinada a un público novo con algunha chiscadela cómica esperta os sorrisos dese grupo de poboación ou se, pola contra, non produce ningún efecto como o agardado».
O que non se mide, non se pode analizar e o que non se analiza, non se pode mellorar. É esta a filosofía que segue este equipo pontevedrés, reducido, pero ben afinado: «Os datos que solicitamos proporcionan información moi valiosa no sector retail e no de publicidade, pero tamén no de seguridade e videovigilancia». Revelan que os seus clientes poñen en práctica a súa tecnoloxía en lugares e de xeitos moi diversos, desde tendas de aeroportos ata axencias de viaxes, desde medir a emoción que causa unha preestrea en televisión ou no cine ata o impacto dun escaparate, desde comprobar a identidade dunha persoa ata rexistrar a súa expresión cando interacciona cun robot. O resultado é ouro para o que está do outro lado, o que vende : con esa información, ben interpretada, non só terá un control exhaustivo senón que ademais axustará o tiro. Na axenda de Releyeble hai agora outra tarefa pendente: identificar accións dos consumidores dentro dun establecemento para saber cales son os produtos máis atractivos. En marcha.