Autocares J. Pombo, con sede en Tella, Ponteceso, cumpre 83 anos. É a terceira xeración dunha empresa que posúe unha flota de 27 vehículos
02 dic 2018 . Actualizado ás 05:11 h.«Naquela época había unha gran demanda de transporte en Corme, onde naceu o meu avó, non só de mercadorías nas feiras e os mercados da zona, senón de centos de persoas que ían traballar fóra, ás cidades, moitas a A Coruña». José Ramón Pombo Imia ten 43 anos e representa á terceira xeración dunha empresa emblemática na Costa da Morte: Autocares J. Pombo.
O seu fundador foi Ramón Pombo Seoane, un cormelán que acabou montando, hai agora 83 anos, unha empresa con sede social en Cabana, pero con naves no polígono de Tella (Ponteceso), Santa Comba e A Grela (A Coruña). Seguiulle a continuación no negocio o seu fillo, Jesús Pombo Mariño, que na actualidade ten 65 anos.
A empresa factura ao redor de 1,2 millóns de euros, posúe unha flota moderna de 27 vehículos -adaptados todos eles á esixente normativa europea sobre emisións de gases- e dá emprego a 20 persoas de forma directa, «aínda que poden ser outras tantas indirectas, entre seguros, talleres, gasolineiras...».
Con respecto á clientela da compaña, José Ramón Pombo explica que está «moi diversificada, tamén de fóra da Costa da Morte e de Galicia. Traballamos cunhas axencias, polo que temos buses circulando por Europa dez meses ao ano para viaxes de lecer, onde predominan os turistas asiáticos e sudamericanos».
Como toda empresa pontecesana que se prece, Autocares J. Pombo ten como referente a Eduardo Pondal. Un dos seus vehículos foi bautizado co nome do gran poeta, autor, entre outros textos, de Queixumes dous Piñeiros, cuxos versos inspiran O Himno Galego. Agora, a empresa pontecesana leva o nome dun dos abanderados do Rexurdimento por toda Europa: «Bautizouse así cando se cumpriron os cen anos do nacemento do poeta e dende a fundación comentáronos a posibilidade de poñerlle a un autobús o nome de Eduardo Pondal e para nós é un orgullo», relata.
Influencia
Sobre o papel que xoga a empresa na súa área de influencia, José Ramón Pombo Imia insiste en que «somos unha empresa establecida na Costa da Morte, vinculada á Costa da Morte, con todos os vehículos adaptados ás necesidades do cliente e estamos concienciados niso. O obxectivo é seguir na Costa da Morte sen esquecer os novos mercados. O rural está moi abandonado, baixa moito a poboación, non veñen empresas... Dende Carballo a Cee hai só dúas empresas grandes: Calvo e Ferroatlántica. O resto é un deserto».
Despoboamento
Pombo Imia tamén aborda a problemática social dunha zona que perde cada ano ao redor de mil habitantes (na actualidade están censados 113.000) debido ao saldo vexetativo negativo e ao repunte da emigración: «Damos un servizo no rural, que moitas veces non se valora. Comunicamos aldeas que practicamente o único transporte que ven é o autobús, tanto á mañá como á volta».
E sobre o futuro do sector do transporte de autobús, José Ramón Pombo Imia ten unha visión clara: «Polo xeral, pesa e pesará máis o traballo coas Administracións, a través da Xunta, tanto colexios, institutos, centros de día... E logo está o discrecional, as viaxes longas e os acordos coas axencias».