Nun momento no que a economía trata de reinventarse, aflorou un novo concepto que aposta pola economía marítima como un dos principais impulsores do crecemento do futuro de Europa
10 dic 2018 . Actualizado ás 13:54 h.Se hai unha cor que define a Galicia é o verde. Pero tamén o azul. Os máis de 1.400 quilómetros de costa que dan ao Atlántico e o Cantábrico dan boa conta da estreita relación co mar. En termos de emprego, a comunidade galega representa ademais o 51,4 % de todo o sector pesqueiro español. Nun momento no que a economía trata de reinventarse, aflorou un novo concepto, blue growth ou crecemento azul. «Trátase dun concepto creado recentemente pola Comisión Europea dentro da súa estratexia atlántica, que aposta pola economía marítima como un dos principais impulsores do crecemento do futuro de Europa», explica Enrique López Veiga, presidente da Autoridade Portuaria de Vigo. O dique vigués lidera a rede de portos europeos que xa comezaron a transformación azul e a Comisión Europea podería recoñecerllo moi pronto.
Entre os obxectivos fundamentais do porto galego atópase a redución de emisións de gases de efecto invernadoiro un trinta por cento antes do 2022. «Un dos proxectos que temos en marcha chámase Hive e promove o uso de gas natural licuado entre os buques que permanecen no porto. En lugar de usar o motor, que xera moita contaminación, o barco se enchufa a uns depósitos que nos permiten fornecerlle a enerxía que necesita usando como base o gas natural licuado», engade López Veiga. Dentro dese compromiso por mitigar o impacto ambiental, o Porto de Vigo tamén desenvolveu un proxecto de captación de dióxido de carbono a partir de algas autóctonas. «A maioría das empresas, sobre todo multinacionais, dedícanse a comprar bosques para compensar a súa pegada de carbono. Como nós somos un porto e queremos apostar pola economía azul, decidimos facelo con algas mariñas. Traballamos con científicos da Universidade de Vigo para identificar cales son as mellores algas que se poden adherir a estruturas artificiais. Este método permite capturar dez veces máis CO2 que unha árbore. Ademais, este sistema axuda a rebaixar a acidez do mar, outro dos problemas derivados da emisión de gases de efecto invernadoiro», comenta Carlos Botana, xefe de Sustentabilidade do Porto.
Enerxía e alimentación
O océano permitiu a vida na Terra e encárgase de protexela, mesmo cando os seres humanos se empeñan en expoliarlo. Segundo un estudo recente publicado na revista Nature, desde a Revolución Industrial absorbeu o noventa por cento das emisións de CO2 e da calor de orixe antropogénico. Sen o seu estimable colaboración, a temperatura sería moito máis elevada. O mar ofrece ademais todo o necesario para transformar o modelo económico.
Pode ser por exemplo unha fonte inesgotable de enerxía limpa e en Galicia xa existen iniciativas para extraela. Unha delas é o proxecto Magallanes, o único en España que se atopa nun estado avanzado para o desenvolvemento de produción de enerxía mareomotriz. «Xeramos electricidade a partir do movemento das mareas. Por efecto da Lúa, a masas de auga móvense e nós aproveitámolo a través de turbinas que instalamos debaixo da auga. Este é un sistema con moito potencial porque no futuro terá que haber moitas máis fontes de enerxía renovable, pero só esta é predicible. Sabemos perfectamente canta enerxía seremos capaces de producir o 25 de xaneiro do 2025 e isto non é posible con outras enerxías limpas», subliña Pablo Mansilla, director técnico de Magallanes.
O mesmo xiro de 180 graos que se require na forma de relacionarnos coa enerxía tamén se esixe no sector da alimentación. O océano poderá seguir sendo o supermercado da humanidade, pero cunha xestión moito máis sostible e consumindo novos alimentos que ata agora non entraban no menú. Un dos que ten máis potencial é a alga. Porto Muiños, unha empresa con sede en Cerceda, atopou un bo negocio alimentando ao mundo con algas galegas. «Hai 25 anos que estamos a traballar cun produto que ao principio non deixaba de ser un descarte do mar ou reutilizado para outro tipo de actividades como o abono. Nós empezamos a recollelas para incluílas na alimentación. As posibilidades son enormes. Xa podemos introducilas en todo tipo de pratos, como peixes, carnes, marisco, ensaladas, arroces e mesmo nunha sopa», di Rosa Mirás, xerente da empresa familiar.
Turismo marítimo
A Unión Europea quere que o novo modelo de sociedade que acompañe ao crecemento azul coñeza mellor o mar. O océano non só pode ser unha fonte enorme de enerxía e alimentos, senón tamén o mellor reclamo turístico. Algúns países están a empezar a entender que un peixe resulta máis valioso vivo que morto. En Filipinas, nadar con quenllas balea reporta enormes beneficios á economía local. Galicia, que acolle unha riqueza mariña única no planeta, conta con todo o necesario para sacar rédito do mar para non depender exclusivamente da pesca. Bluscus é unha das primeiras empresas de turismo marítimo da comunidade. «Ofrecemos actividades de lecer fomentando sempre a cultura, o patrimonio e a tradición cun obxectivo ben definido, potenciar as zonas costeiras. Ofrecemos unha experiencia mariñeira a grupos reducidos a bordo de barcos de pesca que son non moi grandes porque ante todo queremos que sexan actividades sostibles», explica Pablo Mariño, xerente. O catálogo de ofertas inclúe paseos en veleiro, coñecer in situ o funcionamento dunha batea ou asistir á posta de sol desde o mar. «O publico que demanda o noso servizo agora mesmo vén sobre todo do territorio nacional pero tamén hai un incipiente interese de turoperadores internacionais», recoñece Mariño. Outra das actividades estrela é o avistamento de cetáceos. O verán pasado observáronse varios exemplares de balea azul nas rías galegas. Os científicos aseguran que poderían estar a volver á que un día foi a súa casa. O regreso do xigante do océano proporciona un valor engadido. Se llo propón, Galicia pode ser potencia na nova economía do futuro.
Bluscus aproveita a actividade marisqueira como fonte de turismo.