Quintana proponse negociar «a cara de can» para reverter a redución de cotas
04 dic 2019 . Actualizado ás 05:00 h.Desde os 15 millóns de euros que perdería a flota do cantábrico-noroeste e Gran Sol, que ten a pescada como unha das súas especies obxectivo, ata os 13 millóns que se deixarían de ingresar os buques que viven da pesqueira do xurelo. E a iso aínda hai que engadir a diminución nas lonxas, os portos e a industria. O Goberno galego estima que a proposta de totais admisibles de capturas (TAC) e cotas que expón a Comisión Europea para o ano próximo tería un impacto de máis de 86 millóns na economía galega, tendo en conta que 64 das 81 ramas de actividade están directamente relacionadas coa pesca. Son as cifras que achegou a conselleira de Mar, Rosa Quintana, durante a súa comparecencia ante o Parlamento, onde asegurou que traballará xunto ao Executivo central en Bruxelas para «reverter» os recortes propostos.
Quintana volverá representar ás comunidades autónomas na reunión que o Consello de Ministros de Pesca celebrará os días 16 e 17 deste mes para fixar as novas cotas de captura. É unha negociación determinante para a flota galega, onde se xoga boa parte da súa viabilidade en só unhas horas, aínda que a conselleira intentou desmontar a imaxe do «mercadeo persa» e facer valer todo o traballo realizado nos meses previos para convencer con argumentos científicos ás autoridades comunitarias de que é posibles suavizar algúns recortes.
Das 72 cotas de captura de especies establecidos para o Atlántico, as augas na que faena a flota galega, só en 13 melloran as posibilidades de extracción na proposta que fai Bruxelas. Outros 19 TAC manteríanse igual, mentres que os 40 restantes experimentan unha corrección á baixa, con tesoiradas de entre o 41 e o 50 %, segundo as zonas, que se lle daría á pesqueira do xurelo ou a prórroga do peche da pesca de lagostino no Cantábrico.
O PSOE demanda á Xunta «lealdade institucional» co Goberno para negociar ante a UE Entre tantas sombras tamén hai algunhas luces, como os incrementos de cota de entre o 7 e o 8 % para o peixe sapo no golfo de Biscaia e o oeste de Irlanda ou a mellora do 12 % da cota de rapante en augas ibéricas, incremento que se limitaría ao 3 % no caso do Gran Sol. Rosa Quintana considera que tamén hai datos positivos, relativos á recuperación da biomasa, para demandar aumentos de cota de pescada e caballa.
Recorte para 3.700 tripulantes
A representante da Xunta comprometeuse a negociar «a cara de can» para defender os intereses do sector, pois a proposta de Bruxelas recortaría de xeito substancial os ingresos de 3.700 tripulantes galegos, produciría unha diminución de ingresos de 46.000 euros en cada buque de arrastre de litoral. O impacto directo no sector pesqueiro sería de case 37 millóns de euros, que se dobraría ata os 86 millóns no conxunto da economía galega.
A oposición valorou de forma desigual a comparecencia da conselleira de Mar. Desde o PSOE -que goberna en España e liderará a negociación en Bruxelas- a deputada Patricia Otero pediu «lealdade institucional» á Xunta para «ir da man» co Goberno na negociación. Xan Xove (Común dá Esquerda) esixiu á Xunta unha «actitude proactiva» para dotarse de maiores mecanismos de cogestión co sector, e Montse Prado (BNG) lamentouse de que Galicia non teña «nin voz nin veto nin voto» nesta negociación.
Desde a tribuna de invitados escoitaron a intervención algúns representantes do sector, como José Blanco, dos cerqueiros de Acerga, que lamentou a falta de medidas da Xunta nun ano en que as vendas de xurelo caeron un 40 %.