Xesmar, a «app» galega de xestión do marisqueo, recibe un premio en Bruxelas
SOMOS MAR
Foi elixida entre 40 iniciativas este martes en Bruxelas como mellor proxecto para construír capital social
04 dic 2019 . Actualizado ás 05:00 h.No que foi un dos seus primeiros actos como novo comisario de Medio Ambiente, Océanos e Pesca, o lituano Virginijus Sinkevicius entregou onte á patroa maior de Vilanova, María José Vales, e a Pablo Dorgambide Avilés, creador da aplicación Xesmar, o premio ao mellor proxecto na categoría construíndo capital social pola ferramenta de xestión do marisqueo.
Vales e Dorgambide viaxaron a Bruxelas para tomar parte nunha exposición na que se exhiben un total de 40 proxectos cos que mostrar en que se investiron os fondos destinados á dinamización de zonas costeiras nos últimos catro anos e albiscar cara a onde camiñará Europea a partir do 2020.
Un dos proxectos elixidos foi precisamente a ferramenta dixital Xesmar, do galego Pablo. Esta plataforma creouse no marco do grupo de acción local de pesca (GALP) Ría de Arousa para mellorar a xestión, o control e a planificación diaria das actividades de marisqueo. Na actualidade dá servizo a 430 profesionais das Confrarías de Cambados e de Vilanova de Arousa desde que comezou a andar no 2018. Desde entón, as produtoras de ambos os depósitos reciben no seu teléfono móbil información tan importante como os horarios de saída ao mar, os traslados de marisco que deben facerse ou as vendas de cada día.
O enxeñeiro galego cativou aos presentes cunha labia digna dun director de mercadotecnia, explicando con paixón a importancia do seu produto para as traballadoras. Subliñou a importancia que ten para el «a visibilidade do sector e o esforzo que está a facer por ser cada vez máis competitivo e máis sostible».
A patroa da Confraría de Vilanova, María José Vales, defendeu con entusiasmo esta aplicación, que lles supuxo unha revolución no día a día. Ademais, sinala que implica unha redución de papel enorme, o que supón unha mellora ambiental. A directora xeral de Desenvolmento Pesqueiro, Susana Rodríguez, mostrouse satisfeita de que FARNET teña escollido este proxecto para o evento, que a Xunta xa premiou no 2016 polo seu carácter innovador.