Quéixanse de que se permita extraer o produto na ría local aos recolectores do depósito da Coruña
21 jul 2019 . Actualizado ás 05:00 h.A recollida de algas no interior da ría ferrolá para a súa posterior explotación está a piques de xerar un conflito que os socios da Confraría de Ferrol pretenden liquidar «polas malas» se a Xunta non lle pon remedio de inmediato polas boas. Segundo informou onte a patroa maior de Ferrol, Isabel Maroño, os membros do depósito local interesados na comercialización deste produto están indignados polo feito de que a Administración galega aínda non teña dado o visto e prace ao plan de explotación de algas que presentaron a principios deste ano e que, aínda por riba, ampliase a zona de actuación da Confraría da Coruña ao interior da ría ferrolá.
«Pola forza»
«Vemos que veñen un día si e outro tamén a quitarnos as algas, polo que, cando se aprobe o noso plan de explotación, xa non quedará nada porque o terán esquilmado todo», manifestou Isabel Maroño, engadindo que os socios ferroláns se mostran dispostos a, se é necesario, «botar pola forza» aos da Coruña.
Segundo a patroa maior, esa ampliación do ámbito de recollida dos membros do depósito coruñés aprobouse hai poucos días, mentres que o plan de Ferrol segue á espera desde fai sete meses.
En vista da situación, desde a Confraría ferrolá xa se solicitou unha entrevista cos responsables da Consellería do Mar e tamén se chamou ao Servizo de Gardacostas para que impedise o acceso aos membros do depósito coruñés ao interior da ría, sen ningún resultado polo momento.
Segundo explica a patroa maior de Ferrol, a mellor zona de extracción é a situada entre os castelos de San Felipe e A Palma, que é na que pretenden colleitar algas os ferroláns, mentres que á altura do porto exterior local e tamén en augas das rías de Ares e Sada xa ten a concesión desde hai tempo os membros da Confraría da Coruña.
Isabel Maroño asegura que os ánimos dos socios están moi caldeados e esixe á Xunta que trate de pór unha solución antes de que estale un conflito que pode ter graves consecuencias.