A flota do Cantábrico satura de anchoa o mercado, no que se vende a dous euros
PESCA E MARISQUEO
Non houbo venda onte e tampouco a haberá o venres á espera de que baixen as cotas
20 may 2019 . Actualizado ás 18:23 h.Aínda queda para que arrinque a costeira do bonito, e máis aínda para que comece a tempada da sardiña -que este ano se presenta pobre se prospera o plan bendicido por Bruxelas-. E como apenas se atopa xurelo, e a cota de xarda é escasa e non hai moito máis ao que ir, moitos cerqueiros atopan na costeira da anchoa unha forma de diversificar a actividade. Eduardo Carreño, de Portosín, habitual da campaña, asegura que este ano son máis os barcos galegos que optaron por trasladarse ao golfo de Biscaia a capturar bocarte. Buques que nunca participaran na costeira ou que facía anos que non o facían están agora en portos como Ondárroa ou Pasaxes.
Hai anchoa para todos. A especie abunda no caladoiro, non en balde o stock atópase desde hai anos en máximos históricos, segundo certifican os estudos científicos. Agora ben, non é a do tamaño máis desexado. A grande é difícil de atopar. A pequena satura o caladoiro. E iso reflíctese nos prezos. «A boa, a de 28 pezas en quilo, págase a sete euros, pero a que está collendo a maioría da flota, de 50 ou 55 grans en quilo, non chega ao euro, entre 60 e 80 céntimos», explica Carreño.
El e os outros once homes da tripulación chegaron onte en autobús a Ondárroa. Tiñan previsto empezar a pescar pola tarde, pero non poderían vender ata hoxe. É unha das medidas que as organizacións de produtores de Galicia, Asturias, Cantabria e o País Vasco tomaron para tratar de retardar a costeira. E é que, precisamente, a abundancia non só está a afectar negativamente aos prezos no mercado, que recibe tal avalancha de anchoa con etiquetas que apenas acadan os dous euros. Tamén está precipitando o final da campaña. «A estas alturas xa vai consumida a metade ou máis da cota», apunta o armador sonense. Nada estraño se se ten en conta que se estaban «descargando 600 e 700 quilos diarios nas lonxas», di.
Por iso decidiuse suspender a venda de hoxe e a do próximo venres. Medidas de urxencia en tanto non chega a aprobación, por parte do Ministerio de Agricultura e Pesca, da rebaixa de cotas que solicitaron.
Segundo a resolución emitida ao principio da campaña, os barcos poden capturar 10.000 quilos se se trata de unidades que levan unha tripulación composta por doce ou máis homes ou se teñen máis de 150 GT (toneladas de arqueo), e 8.000 para os que están por baixo desas dimensións e levan menos dunha ducia de traballadores a bordo. De modificarse o establecido, os buques pasarían a poder capturar a partir do luns que vén 8.000 e 6.000 quilos, respectivamente.
O presidente da Federación de Confrarías de Cantabria, Miguel Fernández, en declaracións a Europa Press, sinalou que aínda quedan por diante dous meses, maio e xuño, e o consumo de cota é elevadísimo. Aínda con semana e pico de abril por diante, xa se descargaron case 10 millóns de quilos, cando a cota de anchoa na VIIIc -de Fisterra ao golfo de Biscaia- é de 20 millóns de quilos.
Os pescadores vascos achacan os baixos prezos a que as fábricas aínda non entraron a comprar anchoa, que se vende maioritariamente en fresco. Pero ocorre que o tamaño do peixe non é o que interesa á conserva, que prefire as unidades máis grandes para as súas latas.