Gonzalo López deixou Buenos Aires atrás para lanzar a súa carreira musical desde a localidade lucense
18 sep 2021 . Actualizado ás 05:00 h.Gonzalo López naceu en Buenos Aires e desde hai un ano e medio decidiu asentarse en Sarria . Que o seu apelido coincida co máis común entre os oriúndos da comarca sarriá non é unha casualidade. Os bisavós do mozo arxentino eran galegos e o seu apelido era outro. «Emigraron a Arxentina e cando o seu barco chegou ao porto, por ser españois, puxéronlle López», conta Gonzalo. Por estas raíces, o arxentino trasladouse a Sarria e é neste concello lucense onde se propuxo lanzar a súa carreira musical: «Aquí hai un gran xerme cultural. É un bo sitio para facer música».
Non é a primeira vez que Gonzalo López está en terras lucenses. Cando era pequeno, a principio dos 90, os seus pais pasaron uns anos en Sarria motivados pola historia dos seus antepasados. Desde entón, non foi ata o 2020 cando volveu e esta vez para quedar. «Vin por cuestións familiares, estalou a pandemia, era imposible regresar a Buenos Aires e deime conta de que Sarria era un bo sitio para continuar os meus proxectos», relata.
Como berce musical que é, en Sarria abundan os técnicos de son e un deles é agora Gonzalo. «Traballo cunha banda local e este verán non paramos», conta. É un emprego que lle comprace porque lle permite coñecer Galicia, xa que actúa en diferentes puntos da comunidade. Agora que pasou o verán e as actuacións comezarán a diminuír, o arxentino quere centrarse en traxectoria como músico. Actúa baixo o nome de «O mozo López», lembrando a como se chamaría un artista de boleros, aínda que o seu estilo sexa moito máis experimental. López está ligado á música desde sempre, toca o baixo e manéxase co sintetizador pero, como músico, deuse conta de que «compor é fundamental para dar a súa imaxe». Así que deixou de tocar en bandas para experimentar coas súas escrituras.
Mesturando indie, pop e música electrónica, o arxentino econtró no acto de compor o que máis lle gustaba da música: «Quero xerar atención no receptor regalándolle unha historia para que a faga súa, que sexa de quen a escoita».
Desde que reside en Sarria, sacou dúas cancións con videoclip. Un deles «A conclusión» está gravado en Láncara, o que pon en valor tamén a contorna natural da comarca. Para este tema inspiroulle que non lle coñecese ninguén. «É divertido o anonimato nun pobo. Saía cunha camiseta rosa fucsia e notaba como a xente me miraba pero non sabía quen era», chancea. Aínda que pasar desapercibido foi algo que cambiou en pouco tempo. Gonzalo descubriu a asociación Rúa dá Música e converteuse na súa segunda casa. «A propia idea do local é moi linda, porque os grupos poden ensaiar e compártese música constantemente», declara. As iniciativas que se realizan en Sarria tamén o motivan a el para dinamizar a vida cultural da vila, polo que xa está a pensar en organizar algunha cita con cantautores, por exemplo.
Ademais, o arxentino agradece a boa acollida dos sarriáns. «É un pobo con moito talento, bandas e músicos. Pensaba que sería un lugar máis tradicional pero hai un ambiente alternativo no que me atopo moi cómodo», conta. De feito, López xa participou en varios concertos na vila lucense. Agora está a traballar no seu disco e agarda poder ofrecer actuacións para presentalo en acústico, onde se sente máis cómodo.