A intervención á altura da Pobra prevé iniciarse en xuño
19 feb 2020 . Actualizado ás 08:41 h.Un total de 14 empresas presentaron as súas ofertas para executar a primeira fase do desdobramento da vía de altas prestacións (VAP) que transcorre entre Nadela e Sarria, cun investimento que ascende a 24,6 millóns de euros. Está previsto que as obras comecen a mediados de ano no tramo de 11,5 quilómetros que vai da Pobra de San Xiao a Sarria.
A intervención busca reforzar a seguridade dos condutores, así como mellorar a funcionalidade e os niveis de servizo desta vía de altas prestacións, segundo informou onte a Consellería de Infraestruturas e Mobilidade da Xunta.
O incremento do tráfico no tramo entre A Pobra de San Xiao e Sarria xustifica, segundo a Consellería, o inicio destas obras de desdobramento. No ano 2018, o incremento do tráfico na vía ascendeu a unha 4,5% fronte ao 0,5% rexistrado no conxunto de estradas da rede autonómica.
Ademais da elevada intensidade do tráfico nesta parte do corredor, cuns 7.450 vehículos diarios, esta presenta unha orografía complicada, con pendentes pronunciadas que obrigan aos condutores a reducir a velocidade dos vehículos e diminuír os adiantamentos.
O proxecto inclúe a construción dunha nova calzada paralela á que xa existe na marxe esquerda en sentido A Pobra de San Xiao, de maneira que se pasará dunha con dous carrís a dous con dous carrís para cada sentido. Esta intervención tamén está previsto que inclúa as ligazóns e os pasos inferiores e que sirva así mesmo para repor os camiños de servizo que se vexan afectados.
A Consellería de Infraestruturas considera que estas obras permitirán facer o percorrido dun xeito máis rápido, máis segura e con maior comodidade para os usuarios, ata acadar unha velocidade máxima de 120 quilómetros por hora.
Así mesmo, tamén prevé que a intervención permita reducir os accidentes como consecuencia do xabaril, mediante a colocación dun valo reforzado en ambos os lados da vía.