Feijoo entregou en Outeiro de Rei os galardóns que recoñecen o coidado ambiental
20 oct 2021 . Actualizado ás 20:54 h.Nove concellos de Galicia teñen desde hoxe Bandeira Verde. Catro son de Lugo (Alfoz, Mondoñedo, Outeiro de Rei e Sober); tres, da Coruña (Curtis, Ordes e Porto do Son), un, de Ourense (Parada de Sil), e un, de Pontevedra (Moaña). A entrega celebrouse este mércores en Outeiro de Rei, onde se izou ademais o distintivo ambiental xunto ao consistorio. O presidente da Xunta, Alberto Núñez Feijoo, acudiu ao acto, no que destacou a riqueza natural e ambiental como un valor de Galicia e como unha posibilidade económica en alza.
O titular do executivo autonómico encomiou o traballo dos concellos que lograron este distintivo, pois son, dixo, símbolo do coidado da Galicia verde. Tamén destacou que a creación desta bandeiras era un trazo que singularizaba a Galicia fronte a outras comunidades autónomas: na primeira edición, organizada no 2020, foron recoñecidos dous concellos (Moaña e Porto do Son), cifra que case se quintuplica este ano.
Doutra banda, o presidente da Xunta avanzou unha serie de medidas de protección da paisaxe, que definiu como aposta polo «fermosismo galego». Así, lembrou que este ano se deron axudas a 60 concellos e a 450 propietarios para traballos de redución de impacto visual en edificios e en lugares públicos, con dous millóns de euros de investimento; avanzou que se continuaría coa Estratexia da Paisaxe, que inclúe unha guía de boas prácticas, e anunciou que se aumentaría, pasando de 3,6 millóns a 5,6 millóns, o investimento en traballos de cartografía.
As consecuencias destas medidas poden implicar un impacto económico, como lembrou Feijoo na súa intervención. Comparou o tres por cento que supuña o turismo no PIB de Galicia hai 40 anos, ao celebrarse as primeiras eleccións autonómicas, co once por cento de agora e cos máis de cen mil empregos que xera. A chegada do AVE , subliñou, será unha oportunidade histórica para o turismo, que definiu como «a industria branca, que non contamina».
Accións variadas
Os municipios que recolleron o galardón foron recoñecidos por traballos de coidado e de mellora de diversos lugares naturais. Trátase dunha convocatoria que organiza a Consellería de Medio Ambiente e na que as actuacións son avaliadas por un comité. O alcalde de Outeiro de Rei, José Pardo, afirmou que a consecución da bandeira era en certo xeito un premio a unha estratexia iniciada hai anos, pensada para asentar poboación, crear emprego e dinamizar o municipio. Alcaldes e concelleiros dos municipios premiados asistiron ao acto, no que tamén estivo presente a conselleira de Medio Ambiente, Ángeles Vázquez.