O Concello adoptou esta «difícil» decisión pola incerteza que aínda hai sobre a pandemia e a necesidade de tomar unha decisión canto antes para evitar prexuízos aos expositores
19 may 2021 . Actualizado ás 18:13 h.O Concello de Outeiro de Rei acordou por segundo ano consecutivo a suspensión da Feira da Artesanía prevista para o primeiro sábado do mes de xullo.
Segundo explican desde o Concello, aínda que situación actual, derivada da crise sanitaria ocasionada pola covid-19, é bastante mellor que a do ano pasado por estas datas, «a incerteza que aínda acompaña a evolución da pandemia, unido á necesidade de tomar unha decisión cunha certa antelación tratando de evitar maiores prexuízos a expositores e empresas subministradoras dos servizos que require este evento, determinaron non alongar máis a toma desta decisión por parte do goberno municipal».
Fontes municipais sinalan que non foi fácil decidir a cancelación deste popular evento que normalmente atrae a preto de cen expositores e numeroso público a esta localidade, «anulación que seguramente supón un esforzo para as persoas que virían a gozar da feira, pero seguramente moito máis para aquelas outras que virían a traballar na mesma; tamén para o propio Concello de Outeiro de Rei, que espera que a feira teña continuidade o próximo ano», continúan.