Non houbo sorpresas en Outeiro de Rei. Os pilotos Juancho Romero e Marco Díaz proclamáronse campións galegos no VF Challenge Moto Race nas categorías de Supermoto e GP Sport Maxi, respectivamente. Os dous deportistas estiveron a un nivel óptimo e non deixaron opcións aos seus rivais.
A Juancho Romero acompañárono no podio Andrés Domínguez e Adrián Fernández, mentres que con Marco Díaz estiveron Álex Sanmartín e Cristóbal Doce.
En GP Sport impúxose José Manuel Monteagudo. A segunda praza foi para José Expósito e en terceiro lugar finalizou Piñeiro. En minimotos adultos levou o primeiro posto Lorenzo García, ao que seguiron na clasificación xeral José García Amado e Iván Varela López. Os tres primeiros clasificados foron moi superiores aos seus opoñentes.
Na categoría miniGP 110 cumpríronse os prognósticos, e o gran favorito, Sergio da Igrexa, alzouse coa vitoria final. En ningún momento deu opcións aos seus adversarios. En segunda posición acabou Eduardo Manuel Torres e terceiro foi Yerai Vázquez. En categoría infantil de 65 centímetros cúbicos Manuel Dávila impúxose nun duelo espectacular a Brais Pazo, que o intentou ata o final. A terceira praza recaeu en Xusto Sánchez.
Dylan Robles foi o vencedor da categoría de 85 centímetros cúbicos. Completaron o podio Samuel Díaz e Daniel Torre. A competición completouse coa modalidade de minimotos, na que se alzou coa vitoria Edgar Silven, que desprazou ao segundo posto ao gran favorito, Eduardo Torres. Terceiro foi Juan Antonio Pérez. Nesta carreira houbo 85 participantes.