Os veciños máis cosmopolitas da Ulloa reúnense cada mes na feira de Monterroso
MONTERROSO
Ingleses, holandeses, belgas ou canadenses instalados na comarca xúntanse desde hai unha década para compartir as súas experiencias
02 sep 2018 . Actualizado ás 05:00 h.Monterroso adquire un aire máis internacional cada primeiro de mes. Non só se celebra a cita mensual coa feira, senón que é o día que cada mes, desde hai unha década, os veciños máis cosmopolitas da Ulloa e os seus arredores escolleron para reunirse. O seu segundo fogar é a cafetería do Hotel Río Ulla, onde Augusta aténdelles con afecto e en inglés -non en balde estivo emigrada en Inglaterra-. Alí, ingleses, holandeses, belgas, canadenses, filipinos.... comparten as súas experiencias no rural galego e repasan a actualidade dos seus países de orixe. Aínda que, a xulgar polas súas declaracións, a nostalxia non ten cabida. Se algo deixan moi claro desde o principio, é que en Galicia están moi ben e que non entra nos seus plans marcharse.
Quen acoden a este encontro teñen idades e procedencias moi variadas, aínda que a maioría deles xa están xubilados. Son ao redor dunha vintena, que residen en aldeas de Monterroso, Palas de Rei, Taboada, Guntín, Antas de Ulla...
O seu plan para esta cita mensual comeza pola mañá indo á feira de Monterroso, onde realizan algunhas compras e, ás veces, ata comen o tradicional polbo á feira, aínda que «ultimamente está moi caro», explica Lisa, unha das participantes. Despois, quedan no Hotel Río Ulla, onde atoparon o seu particular refuxio.
Colaboración dos veciños
Tanto Lisa como Jayne, outra das inglesas participantes, explican que a súa vida en Galicia, onde levan instaladas varios anos, é a ideal: «Aquí temos unha vida mellor; hai sol, e é un lugar tranquilo». Ademais, destacan a implicación dos seus veciños: «Desde o primeiro momento que chegamos, ofrecéronse a axudarnos; son moi colaboradores e moi amables connosco», destacan. E iso a pesar de que a súa paixón polo rural non sempre é comprendida: «Os veciños non entenden por que compramos casas vellas, restaurámolas e instalámonos en aldeas; pensan que estariamos mellor en Londres, Madrid ou Barcelona», apunta sorrindo Lisa.
E é que os inconvenientes que implica o rural non son tales para eles: «É perfecto así. Que non hai boa cobertura? Non importa, agora estou aquí, en Monterroso, con wifi», continúa Jayne.