A institución provincial investiu 2 millóns de euros na construción, equipamento e posta en marcha destas instalacións, que se suman ás de Trabada, Pol, Ribadeo, A Fonsagrada, Castroverde e Pedrafita do Cebreiro
25 novs 2021 . Actualizado ás 19:55 h.O presidente da Deputación de Lugo, José Tomei, inaugurou este xoves a nova residencia de maiores de Meira . Con esta nova dotación social, crearanse 25 postos de traballo directos para unha atención practicamente personalizada das 30 persoas residentes, aos que hai que sumar os empregos indirectos e o retorno económico que terá para a zona o funcionamento do centro, segundo o órgano provincial.
O presidente da Deputación de Lugo, José Tomei Roca, xunto ao alcalde de Meira, Antonio de Deus, inaugurou este xoves o Centro de Atención a Maiores Santa María de Meira, que pon en marcha a institución provincial en colaboración co Concello, a sétima da rede provincial.
Tomei definiu a rede pública de residencias provinciais como «unha verdadeira medida de apoio ao noso rural, unha medida real para que a xente se quede a vivir nas nosas aldeas e concellos».
O Centro de Maiores de Meira, subliñou, «ofrecerá un servizo público de calidade que garante o benestar e a tranquilidade dos usuarios e usuarias e as súas familias, favorece o arraigo dos maiores no seu entorno e, ademais, crea emprego e dinamiza a economía».
Os usuarios e usuarias da residencia de Meira coñeceron este xoves as instalacións e este venres comezarán os preingresos.
Tomei incidiu en que esta nova dotación social, que conta con 30 prazas de residencia -ampliables a 38 se fose preciso-, ofrecerá un servizo público de calidade «que consegue tres cuestións fundamentais: garante o benestar e a tranquilidade dos usuarios e usuarias e as súas familias, favorece o arraigo dos maiores no seu entorno e, ademais, crea emprego e dinamiza a economía».
Son, polo tanto, 30 cuartos, que poderán ser dobres en caso de necesitar máis prazas na residencia.
A Deputación de Lugo fixo un investimento de 2 millóns de euros na construción, equipamento e posta en marcha da residencia de Meira, ao que hai que sumar a achega do Concello, que sumou uns 200.000 euros e o terreo no que se sitúan as instalacións.
O Centro de Atención a Maiores Santa María de Meira ocupa unha extensión de 3.312 metros cadrados, dos cales 734 están destinados ao edificio. Esta parcela atópase en cálea Grupo Escolar, no centro urbano da vila.
A de Meira é a cuarta residencia que abre a Deputación de Lugo no que vai de mandato e a sétima da rede provincial, pois xa están en marcha Pol, Trabada, Ribadeo, Castroverde, Pedrafita do Cebreiro e A Fonsagrada.
No ano 2022, a institución provincial ten previsto abrir os centros de Navia de Suarna e Ribas de Sil.
