Vibeke Astner, organista: «O meu maior logro é tocar en concertos como solista e como músico de cámara»
LUGO CIDADE
A profesional actúa este mércores no último concerto do Festival do Órgano de Lugo
15 jun 2022 . Actualizado ás 05:00 h.A Catedral de Santa María acolle este mércores o último concerto da novena edición do Festival do Órgano do Corpus Christi. Unha cita que congregou a grandes mestres da música do panorama internacional como o flautista Massimo Mercelli ou o violonchelista Felix Vogelsang. O punto e final estará a cargo da agrupación Só Voces, baixo a batuta de Fernando Gómez Jácome, e da recoñecida organista Vibeke Astner (Dinamarca, 1972). Esta artista tivo inclinacións pola música desde pequena, o que a levou a estudar no conservatorio de Ámsterdam e a actuar como solista e como músico de cámara en países como Francia, Italia ou Alemaña.
—De onde vén o seu amor pola música?
—Levo tocando desde que era practicamente unha nena, toquei outros instrumentos como o piano, polo que é algo que sempre estivo na miña vida.
—Sempre quixo dedicarse á música de xeito profesional?
—Non, só tocaba porque pensaba que era divertido, pero pasado o tempo pensei que podería converterme en profesional.
—Por que o órgano?
—Porque creo que ten moitas posibilidades, podes facer moitos tipos de sons, como sons máis suaves e silencios, e podes facer música bonita. Divírteme e ademais tamén me permite tocar na igrexa.
—Unha das súas referencias é o compositor francés Olivier Messiaen. Por que decidiu especializarse nos seus traballos?
—Porque el crea unha atmosfera especial a través da súa música, crea os seus propios ritmos e os seus propios esquemas musicais. Transpórtache a outro lugar cando o escoitas. Ademais, encántalle o canto dos paxaros, que trata de imitar a través dos instrumentos, polo que é moi interesante.
—Que é necesario para converterse nunha profesional da súa talla?
—Tes que practicar moito e tes que ser capaz de planear o teu día a día, porque tes que organizalo todo. E, por suposto, tes que amar a música.
—Recibiu numerosos premios e bolsas pero, cal é o seu maior logro?
—Creo que o que estou a facer, tocar en bastantes concertos como solista e participar noutros como músico de cámara. En Dinamarca ser organista na igrexa tamén é un traballo, polo que é unha boa combinación.
—Que significa para vostede actuar en Lugo?
—Nunca vin antes a España, polo que é a miña primeira vez, así que está sendo unha experiencia moi satisfactoria.