O Plan de Accesos a Galicia incluía notables obras na N-VI na provincia
10 ago 2021 . Actualizado ás 05:00 h.«Non hai que esquecer que aquí a poboación está diseminada e que a unidade veciñal non é o concello nin a aldea senón o lugar». Son palabras de 1976, pronunciadas en Galicia por un político con responsabilidades de goberno e con raíces galegas. Díxoas en Lugo Leopoldo Calvo-Sotelo e Bustelo, ministro de Obras Públicas e persoa con raíces familiares en Ribadeo : nesa localidade viviu parte da súa nenez e da súa adolescencia, veraneou con asiduidade e está enterrado.
Retrocedamos de novo 45 anos. «Unha rede arterial, en Galicia, non acada a tantas persoas como en Cataluña, por exemplo. As corredoiras son importantes», manifestou Calvo-Sotelo aos xornalistas en agosto de 1976. Tanta importancia tiñan as corredoiras para o Goberno central, presidido por Adolfo Suárez e formado un mes antes, que en 1980, segundo o ministro que chegaría a ser nomeado marqués da ría de Ribadeo, deberían estar pavimentadas.
Se no campo económico hai microeconomía e macroeconomía, no apartado das infraestruturas parece haber microobras e macroobras. A pavimentación das corredoiras, aínda que se tratase dunha actuación ampla polo gran número de vías, podería entrar no primeiro apartado. Con todo, tamén estaban en marcha importantes macroobras, pois nos setenta se executaba o Plan de Accesos a Galicia.
As obras estaban programadas ou en execución en tramos da N-VI situados a ambos os dous lados do Cebreiro: hai 45 anos, había previstas melloras de Astorga á Coruña. Os novos trazados nos portos do Manzanal e de Pedrafita do Cebreiro, a circunvalación de Lugo cidade, a ponte de Rábade e melloras de Betanzos a Ferrol eran algunhas das actuacións incluídas.
Eses traballos formaban parte do denominado acceso norte. O acceso sur incluía traballos entre Benavente e Vigo, xa rematados entón tras actuarse nas estradas N-525 e N-120. En cambio, máis problemas presentaba o acceso centro, que se apartaría da N-VI en Villamartín da Abadía (León) e chegaría a Santiago tras pasar pola Rúa, A Pobra do Brollón, Monforte de Lemos e Lalín.
Outra obra que se comentaba pero que aínda carecía de trazado concreto era a denominada T, que uniría o interior de Lugo coa Mariña, onde a factoría de alúmina de San Cibrao e outros proxectos debuxaban un horizonte industrial. En 1976 non estaba claro se a estrada sairía de Lugo ou de Rábade, aínda que a súa execución como vía independente non levou a cabo. Tamén se agardaba que ese ano renovasen as xestións as deputacións de Lugo e de Oviedo sobre o proxecto de Ponte dos Santos, na ría de Ribadeo.
O viaduto tardou anos en construírse, pero acabou inaugurándose en 1987. Os accesos a Galicia melloraron nos setenta, e as autovías A-52, A-6 e A-8 achegaron a comunidade ao resto de España anos despois. Os asfaltados de corredoiras seguen sendo unha prioridade no século XXI, especialmente cando hai eleccións á vista.
COA túa SUBSCRICIÓN PODES ACCEDER A Todas As NOTICIAS PUBLICADAS EN LA VOZ DE GALICIA, DESDE 1882 ATA HOXE, BUSCANDO POR PALABRA CRAVE