A avalancha de inscricións atrasou a súa posta en marcha, prevista para estes días
19 oct 2020 . Actualizado ás 23:28 h.O pasado 15 de xullo o Concello de Lugo anunciaba a creación dunha bolsa de emprego da que o Concello puidese botar man rapidamente cando o necesitase. A iniciativa recibiu tal cantidade de solicitudes que o goberno de Lara Méndez decidiu ampliar o prazo marcado inicialmente e aceptar documentación ata o 30 de agosto. E é que foron varios miles as persoas que enviaron o seu currículo para optar a esas substitucións.
En total, foron 10.200 os apuntamentos tramitados, entendendo por apuntamentos as solicitudes e a documentación complementaria que os solicitantes tiveron que engadir. «Calculamos que son unhas 7.000 solicitudes as que entraron. Como cada persoa podía presentarse para varias listas, creemos que a cifra de solicitantes pode situarse entre as 2.000 e as 3.000 persoas. Foi desbordante», explica a concelleira de Gobernanza, Paula Alvarellos.
A avalancha de candidatos pasou todas as expectativas, de maneira que o Concello, a pesar de que a súa intención era que a bolsa entrase en funcionamento estes días, asumiu que as listas non estarán preparadas ata dentro de varias semanas. O Concello mesmo tivo que incorporar a un auxiliar administrativo para que catalogue todas as solicitudes nas 42 categorías profesionais que se establecen, e así axilizar o proceso.
Unha vez que toda a documentación estea revisada e as solicitudes clasificadas, chegará o momento da Comisión de selección, que será a encargada de valorar as candidaturas. Cada lista farase por méritos e terá en conta criterios como a experiencia profesional, a titulación, a formación ou o uso e coñecemento do galego. «Estas listas públicas teñen unha vantaxe respecto da empresa privada, e é que non entenden de idades. Nun momento tan complicado como o actual, pode ser unha moi boa oportunidade para moita xente», valora Alvarellos.
Unha vez baremadas as candidaturas, un proceso que inclúe a subsanación de erros e as alegacións, aprobarase de forma definitiva a bolsa de emprego. Cando o Concello abriu o proceso, non se agardaba semellante avalancha de solicitudes, polo que non se expuxo en ningún momento ter que pór un límite de inscritos en cada lista, aínda que de cara ao futuro non o descarta.
As primeiras que se crearán: de auxiliar administrativo a operario de cemiterio
As 42 categorías profesionais para as que o Concello creará listas son variadas e a intención é que todas estean a funcionar canto antes. Con todo, Gobernanza vai priorizar as que xa se atopan esgotadas, ou están a piques de facelo.
«Primeiro imos configurar as listas nas que non temos xente. Hai varias, como auxiliares administrativos, que se necesitan constantemente, igual que administrativo, operario de cemiterio ou oficial lector de contador de augas», detalla Paula Alvarellos. No momento en que estean validadas, entrarán en funcionamento. «Oxalá as máis urxentes estean no prazo dun mes».
As 42 categorías para as que se crearán listas son: técnicos de administración xeral, técnicos medios de administración xeral, auxiliar administrativo, ordenanza, celador de CEIP, oficial condutor, oficial condutor maquinista paleador, oficial condutor mecánico e monitor de educación viaria. Tamén se creará unha lista de emprego para: arquitectos, arquitectos técnicos, delineantes, enxeñeiro de montes, enxeñeiros industriais, enxeñeiro de camiños, canles e portos; enxeñeiro técnico agrícola, enxeñeiro técnico industrial, enxeñeiro técnico de obras públicas, mestre electricista, oficial electricista, oficial albanel e operador de obras.
Así mesmo, tamén se crearon categorías para traballador social, animador sociocultural, oficial cociñeiro, axudante de cociña e limpeza, traballador de familia auxiliar de fogar, técnico de educación infantil e auxiliar de biblioteca.
A nivel musical crearanse listas nas especialidades de frauta, clarinete, saxofón, fagot, trompa, trompeta, trombón, bombardino, tuba, piano, gaita e percusión. Outras das especialidades serán as de celador de deportes, oficial lector, oficial fontaneiro, operario da rede de augas, oficial maquinista fontaneiro, analista programador, técnico especialista TIC, oficial sepulturero, operario de cemiterio e oficial vixiante recadador.
«É fundamental ter listas, moitas agora xa están esgotadas», di Alvarellos
A bolsa de emprego municipal dotará ao Concello de Lugo de listas das que tirar cando queden sen traballadores nalgún posto. «É fundamental ter estas listas. Nós non podemos acudir ao INEM a contratar cando quedamos sen un traballador, só en casos moi, moi excepcionais, por iso necesitabamos ter listas, e ata agora no Concello non as había, moitas estaban esgotadas por ser listas moi antigas», sostén a concelleira Paula Alvarellos.
Coa entrada en funcionamento da nova bolsa de emprego municipal, o obxectivo é non volver ter listas descubertas. «O noso obxectivo agora é que esas listas non queden nunca baleiras». Vista a cantidade de solicitudes presentadas, non parece difícil.
