Lidia de la Fuente lanza unha audioguía da cidade cunha versión adaptada para que os máis pequenos poidan desfrutar en familia
07 ago 2020 . Actualizado ás 12:24 h.Emprender en tempos de crise pode soar ata desafiante, pero disque non hai mal que cen anos dure, e quizais só sexa cuestión de visualizar a oportunidade e saber aferrarse a ela. Iso foi o que fixo Lidia de la Fonte, unha veciña de Lugo que exerce como guía oficial de turismo na cidade amurallada e que xestiona «Camiños con arte», a súa propia empresa de visitas guiadas. Levaba tempo preparando unha audioguía para adultos, cunha versión adaptada para que os máis pequenos da familia tivesen tamén a oportunidade de coñecer as entrañas da antiga metrópole romana. Agora, un traballo que precisou de meses de esforzo e produción ve por fin a luz e dende o pasado xoves xa está dispoñible para todos aqueles veciños e turistas que desexen facer unha ruta pola capital luguesa acompañados, de xeito virtual, por unha voz chea de experiencia e polos ritmos de Brath, unha banda local de música folk que ambienta esta locución de case 60 minutos.
-A audioguía preséntase como un negocio de futuro, en que consiste o teu proxecto?
-Está pensado para que, sobre todo os visitantes, poidan coñecer a cidade ao seu ritmo, sen ter que axustarse a uns horarios concretos e sen ter que meterse en grupos numerosos, que coa situación actual é algo que a xente ten moito en conta á hora de reservar unha viaxe. Só precisan dun dispositivo móbil e duns auriculares.
-Como se pode adquirir?
-O cliente pode facerse coa gravación a través da páxina web de «Camiños con arte». Alí temos unha sección de audioguías e só terían que entrar e reservala.
-Ten dúas versións, unha para nenos e outra para adultos. A que se debe esta decisión?
-Non había en Lugo unha oferta destas características para as familias con nenos que tivesen interese na cultura e na historia da cidade. A miña idea era que as crianzas de entre 6 e 12 anos se sentisen tamén partícipes desta visita á cidade, pero adaptada sempre á súa condición de nenos.
-Como conseguiches esa adaptación?
-A locución dos adultos dura unha hora, e a dos rapaces trinta minutos. É moito máis dinámica. Ademais, utilizo outra linguaxe, outro ton, os contidos están moi adaptados a eles... É información máis complementaria, que inclúe tamén curiosidades para que poidan ir compartindo sensacións coa familia e participando xunto a eles dunha forma interactiva, pero sen perder esa graza que os caracteriza.
-Hai algún tipo de itinerario fixado para seguir?
-Cada un pode facer o percorrido como mellor lle veña, adaptalo ao seu gusto e ás súas necesidades. De todos xeitos, eu propoño un que é o que me parece máis práctico e cómodo. O punto de partida sería a Torre da Mosqueira, para despois continuar a pé pola muralla ata a porta de Santiago. Este itinerario tamén pasa pola Praza de Santa María, a Casa dos Mosaicos, o Museo Provincial ou a Praza do Campo, e finaliza na Ponte Romana e nas termas, ao carón do Miño.
-Ademais da túa locución, o proxecto ten un acompañamento musical...
-A audioguía conta con algún tema do grupo folk lucense Brath que complementa como son ambiente a locución, e tamén ten outros fragmentos de música galega. Ademais, antes de comezar coa información dos lugares a visitar, hai unha introdución histórica que paga a pena escoitar.