O piloto meirense regresa acompañado polo seu irmán Diego. Correrán co Porsche 911 co que foron campións en 2010
21 sep 2021 . Actualizado ás 11:08 h.O Lobo de Meira aúlla de novo. Sergio Vallejo anunciou que estará presente no 53 Rali de Ourense que dará comezo o 24 de xullo. Farao acompañado por outro «lobo», o seu irmán Diego. O propio Sergio comunicou a noticia a través da súa renovada páxina web, vallejoracing.com.
Na nota, o dúas veces gañador do Campionato de España de Ralis de Asfalto indicou tamén cal será o coche co que estará na saída de Ourense, o Porsche 911 co que conseguiu o seu último título nacional. Entre os motivos para volver, Sergio destacou a necesidade de asumir novos retos e aventuras, ademais de recoñecer que eran moitos os «amigos, afeccionados e mesmo algún patrocinador», os que pedían o seu regreso ao asfalto. Vallejo mostrouse especialmente agradecido con estes últimos, pois foron os que fixeron posible a súa volta.
Previsións realistas
Será difícil que no seu retorno ao asfalto Vallejo consiga estar entre os primeiros, aínda que se algo demostraron os irmáns meirenses é que se crecen ante calquera dificultade. O propio Sergio recoñeceu que a participación nesta proba será un feito illado, pois o paso dos anos e as características do Porsche dificultarían pelexar polas vitorias, algo fundamental para os Vallejo.
Fai tres anos que Sergio correu o seu último rali de asfalto e agora volve cun coche que lle brindou a oportunidade de acrecentar a súa lenda. Un coche que, paradoxalmente, agora «non está á altura dos máis modernos R5 nin aínda se permitisen correr sen a brida, que non é o caso», como puntualiza o propio piloto.
Non pechan ningunha porta
Sergio cualifica de «soño» a opción de subir ao podio en Ourense. Quen sabe, talvez un bo resultado sexa o empuxón que necesite o meirense para frecuentar este tipo de probas con máis asiduidade. Por agora, non pecha ningunha porta: «Calquera clasificación darémola por boa. Despois xa veremos se corremos algún rali máis»