«O Xacobeo é unha oportunidade para Lugo e entre todos deberiamos deseñar estratexias»
LUGO CIDADE
A directora do Museo do Mitreo, Dolores Dopico, cre a cidade ten potencial para seguir crecendo no turismo cultural
15 sep 2020 . Actualizado ás 11:43 h.O Museo Universitario Domus do Mitreo, dependente da USC, converteuse en apenas ano e medio de vida no centro arqueolóxico máis visitado da cidade, con máis de 16.000 visitas neste 2019. A ampliación de horarios e días, as actividades paralelas ao museo, ademais da calidade do xacemento e mellora das instalacións provocou que se incrementasen nun 30 % o número de visitas con respecto á xestión municipal de antes de maio do 2018. A directora deste museo é a profesora de Humanidades Dolores Dopico, quen explica os obxectivos do centro.
-Nós pretendemos ofrecer un museo, non só un xacemento visitable, senón que hai máis facetas a incluír. Por exemplo, a didáctica. Para o 2020 imos ampliar este apartado, para que a visita non sexa só 30 minutos cun guía, senón que vaia acompañado de unidades e fichas para todo tipo de alumnos, incluídos talleres, cadernos de actividades, xogos e guías para os profesores. Queremos chegar a todos os colexios, porque os alumnos de Galicia teñen unha visita obrigada, que é Santiago e a súa catedral. Lugo, en xeral, debería ser a segunda gran visita de todos os alumnos galegos.
-Que máis queren desenvolver?
-Imos ter unha páxina web e o arqueólogo do xacemento, Celso Rodríguez, publicará a tese que presentará a inicios do 2020. Ademais de didáctica, queremos divulgar. Xa estamos a organizar actividades cando se producen grandes eventos na cidade, como San Froilán ou Arde Lucus. E facémolas para todos os públicos, desde especialistas ata familias. E a terceira pata é a musealización, onde faremos cambios para ir mellorando.
-Que pode achegar este museo ao turismo cultural de Lugo?
-Eu creo que a cidade ten que ser coñecida como unha unidade, non fragmentada. O noso museo non se pode ver á parte do resto, independentemente de quen o xestione. O importante é que traballemos entre todos xuntos e que a cidade sexa vista no seu conxunto desde o punto de vista histórico e á vez en relación cos arredores, porque Bóveda é fascinante e está pouco explotado, ou Viladonga. Xa se falamos do noso museo, hai que ter en conta que temos unha responsabilidade ao ser un centro universitario, vinculado á docencia, a investigación e a divulgación, polo tanto temos unha función social que achegar.
-Cales son os seus potenciais?
-Pois eu sempre digo que somos un polo de atracción turístico porque temos tres elementos excepcionais: pódese ver unha domus, hai un templo mitreo, só hai cinco en España, e que consegue atraer a moitos visitantes, especialmente estranxeiros; e podemos ver o lenzo da Muralla, ofrecemos un punto de vista privilexiado do monumento.
-Fala de estranxeiros, chama a atención que teñen máis visitantes de Madrid que de Lugo.
-É normal, pasa noutras cidades. Lugo ten un tesouro e non se pode permitir perdelo, máis aló de que sexa bo explotalo economicamente. Por exemplo, o Xacobeo 2021 debería ser unha oportunidade e entre todos deberiamos estar a deseñar xa estratexias porque Galicia vai recibir a miles de persoas de todo o mundo e moitos virán a Lugo, especialmente estranxeiros.
-A Lugo séguelle faltando crerllo un pouco máis?
-Somos a única cidade romana de Galicia, tranquila, agradable para vivir e que á xente se a motivas, móvese. Por exemplo, ao hospital chamámoslle Lucus Augusti, ao centro comercial, As Termas... e iso é por influencia. Cando traio xente de fóra de Lugo quedan sorprendidos. «Cando abre a Muralla?», pregúntanme, e eu dígolles que está sempre aberta e quedan alucinados como a xente usa o monumento na súa vida diaria. Temos que espertar o orgullo por Lugo e presumir do que temos.
