A Xunta e a Apehl instalarán de novo un posto dedicado á gastronomía lucense
23 ago 2019 . Actualizado ás 20:45 h.Do mesmo xeito que nos últimos sete anos, Turismo de Galicia e a Asociación Provincial de Empresarios de Hostalería de Lugo (Apehl) porán en marcha un posto de produtos típicos de Lugo na próxima edición da Volta Ciclista a España, que se celebrará desde hoxe ata o 15 de setembro. Así o anunciou o presidente da Aphel, Cheché Real nun acto de presentación no que tamén estiveron o delegado da Xunta, José Manuel Balseiro, e representantes das empresas e asociacións participantes. O posto estará localizado na zona VIP de todas as saídas de etapa.
Ademais dos viños da denominación Ribeira Sacra e o aceite de Quiroga, no posto estarán tamén o queixo do Cebreiro, os pementos de Mougán, as fabas de Lourenzá, Leite 100 % Galega e a Asociación Nacional de Criadores de Gando Vacún Selecto de Raza Rubia Galega (Acruga), entre outros.
Do mesmo xeito que noutras edicións, serviráselles a todos os visitantes aperitivos elaborados con produtos de Lugo e difundiranse exemplares da última edición da guía gastronómica E para comer, Lugo. A Volta non pasará este ano por ningunha localidade galega. Comezará no municipio alacantino de Torrevieja e rematará en Fuenlabrada. O lugar máis próximo a Galicia polo que pasará será o porto de Acebo , preto da Fonsagrada.