Utilizando a documentación falsa, estafaron ao Sergas 16.000 euros tras recibir asistencia sanitaria ao sufrir un deles un infarto
08 novs 2018 . Actualizado ás 19:47 h.Finalizada con éxito a denominada Operación Lumon coas dúas últimas detencións na capital galega e no municipio coruñés de Teo. Axentes da Garda Civil de Lugo detiveron a un veciño de Santiago de Compostela de 35 anos, con iniciais J.M.J, e a outro de Teo, de 46 anos e iniciais A.B.C, como cooperadores necesarios nos delitos de falsidade en documento público, estafa e usurpación de estado civil labores por dous fuxidos da Xustiza.
A detención destas dúas persoas produciuse na fase final dunha investigación que permitiu o arresto, o pasado mes de xullo, de dous fuxidos da Xustiza. Por aquel entón, os detidos foron Luis Ramón Montoya Jiménez, de 40 anos, un prófugo condenado por un homicidio doloso en Lugo, rifa tumultuaria e tenencia ilícita de armas. Este home habíase fuxido do cárcere da Lama cando gozaba dun permiso no ano 2012. Tras pasar seis anos na clandestinidade, o implicado foi capturado en Vigo. O outro arrestado no mes de xullo foi J.A.M, de 30 anos de idade, sobre o que pesaban catro ordes xudiciais de busca e captura para o seu ingreso en prisión.
Tras a detención destes dous individuos, a Garda Civil comezou a investigar a súa contorna para chegar ás persoas que lles proporcionaron documentación falsa para poder realizar diversas xestións ao longo do territorio nacional. Desprazábanse nunha furgoneta con matrícula portuguesa, sen levantar sospeitas.
Facendo uso desta falsa cobertura documental, un dos arrestados recibiu asistencia médica nun hospital galego tras sufrir un infarto. Esta atención supuxo un custo de 16.000 euros.
Os detidos xa pasaron a disposición xudicial.