O arquitecto José Anxo Carreira deseñou as aulas como pequenas casas galegas
07 dic 2017 . Actualizado ás 05:00 h.No esnaquizado barrio da Piringalla non pasa desapercibido para a veciñanza o gran mural creado na fachada lateral dun bloque de vivendas en cuxos baixos abrirá unha escola infantil vangardista. Este centro educacional, que acollerá aproximadamente a medio centenar de nenos de diferentes idades, chámase Reirrei, un insecto que en castelán se chama mariquita e que en galego se denomina tamén xoaniña ou maruxiña.
É o reirrei o gran protagonista deste centro que está na rúa Manuel María. Un neno, descobre nunha saída ao campo como nace o insecto. Leste vai crecendo no mural, sae do mesmo e vai percorrendo todo o contorno do edificio ata chegar a coarse polas fiestras das futuras aulas da gardería.
A escola infantil da Piringalla ten a firma do arquitecto lucense José Anxo Carreira Montes. Segundo expuxo, deseñou as aulas do centro como pequenas casas galegas cunha cuberta «ás catro augas». O aulario convertíase así nun grupo de vivendas con certa similitude ao rural galego.
Carreira Montes, autor de destacados proxectos, evitou os corredores rectos e estableceu nos mesmos varias zonas redondas. O arquitecto planificou o interior como espazo acristalado para que a luz natural gañe forza e sexa protagonista. «Nada é paralelo. Son pequenos movementos para, de forma inconsciente, ir sinuoso», apuntou o arquitecto.
O «reirrei» da Piringalla aínda non pode voar. As obras están moi avanzadas e, se as previsións se cumpren, o centro podería estar operativo a comezos da próxima primavera ou talvez antes.
O establecemento conta con cinco aulas. Unha é para nenos e nenas de 0 a 1 ano; outra para os de 1 a dous e tres, para os de 2 a 3. Dispón tamén dunha sala de berces para uso dos pequenos de 0 a 1. Así mesmo, terá outros servizos como, por exemplo, lavandería, baños, comedor e cociña.
A posta en marcha desta escola infantil é unha boa noticia para o norte da cidade. Pais do barrio expuxeron a problemática que hai á hora de conseguir prazas. Neste sentido indicaron que en todos as garderías da cidade había listas de espera que, en moitos, casos son moi amplas.