Multa de 3.240 euros para un home de Friol que lle ensinou os xenitais a unha nena
FRIOL
O seu defensa acadou un acordo coa Fiscalía para que se lle rebaixase a pena, que inclúe unha orde de afastamento da menor
06 may 2026 . Actualizado á 10:51 h.Un veciño da localidade lucense de Friol aceptou este mércores unha pena de 3.240 euros de multa como autor dun delito de exhibicionismo sobre unha menor de idade. O xuízo celebrouse na praza número 2 da sección do penal do Tribunal de Instancia de Lugo, sala na que se ratificou o acordo de conformidade acadado entre a Fiscalía e a avogada da defensa. Neste pacto, computouse unha rebaixa de pena a cambio de que o autor dos feitos admitise o delito. Así foi e, en apenas uns minutos, a sesión rematou cunha condena firme.
O escrito de acusación do Ministerio Público é moi directo. Nel, relátase que, entre finais do ano 2021 e xullo do 2022, «o acusado, nacido no ano 1959, achándose nas inmediacións do seu domicilio [...] municipio de Friol (Lugo), ao decatarse da presenza nas inmediacións da menor nada [no ano 2009], actuando guiado dun ánimo libidinoso, procedeu a mostrarlle os seus órganos xenitais». Esta conduta supón unha infracción do artigo 185 do Código Penal, delito coñecido como exhibicionismo. Neste caso, de xeito continuado, xa que foron varios episodios. Neste escrito, a fiscal pedía unha multa de 7.200 euros para o acusado. Finalmente, tras o acordo, rebaixóuselle a 3.240.
A vista celebrouse sen a presenza da menor, que agora ten 17 anos. O acordo de conformidade serviu tamén para que ela non tivese que comparecer e revivir unha experiencia que segundo moitos xuristas pode ser traumática para a vítima. Ambas as partes confirmaron na sesión a súa intención de non recorrer a sentenza, polo que xa é firme.