A decisión municipal de subvencionar as permutas de leiras entre particulares espertou interese de veciños polos resultados que pode ter a medida
23 mares 2019 . Actualizado ás 05:00 h.A decisión de subvencionar as permutas de leiras en Friol, unha medida tomada polo Concello e merecedora dunha partida con ese fin no orzamento municipal deste ano, está a causar interese. O alcalde, José Anxo Santos, afirmou onte que se recolleron xa unhas 20 solicitudes. Unha vez acabados os trámites, os implicados deberán presentar nas oficinas municipais a documentación relacionada con ese proceso, o que lles permitirá rebaixar os custos á metade.
Doutra banda, apuntou o rexedor, recibíronse consultas doutros concellos, que teñen un perfil socioeconómico parecido a leste e que mostraron interese en aplicar a medida. Trátase, pois, dunha guerra contra o minifundio en toda regra, aínda que o Concello non toma medidas coercitivas senón que axuda aos que dan pasos para chegar a ter máis terreo para traballar.
Así, explicou, o resultado de permutar leiras para agrupar parcelas próximas non é só o aumento da superficie. Santos, que ademais é gandeiro de profesión, recalca que unha leira grande permite aumentar a produción de herba ou de millo e rebaixar os custos de obtención dunha colleita. Ademais, detallou, o abono e o laboreo resultan máis cómodos.
Así as cousas, o alcalde considerou que o resultado deste proxecto tería consecuencias favorables: «Vai ser positivo», dixo onte. Santos admitiu que o Concello non pode decidir en por si que os veciños permuten leiras entre eles; pero subliñou que si se poden tomar medidas que favorezan a quen viven en e do campo. Nese sentido, lembrou, acordouse unha bonificación do 95 %, a máxima porcentaxe permitida, para as construcións de uso agropecuario no Imposto de Bens Inmobles (IBI) de natureza rústica.
A diminución dos custos administrativos das permutas coincide cun momento no que se realizan procesos de concentración parcelaria, pero nun número menor que hai anos. En Friol están rematadas tres ?as de , Burgo de Negralde e Gándara-Fraga de Carballo de ?, Marcela-Silvelae o alcalde sostén que fronte a eses asuntos, que pasan a capacidade dun concello, poden tomarse outras medidas, que se non son tan importantes si supoñen unha axuda para os gandeiros.
Para Santos resulta vital, por exemplo, que as explotacións teñan bos accesos, algo que explica cun exemplo: se as pistas están en boas condicións, permiten o paso de camións de gran tonelaxe; así as viaxes para a subministración de certas materias serán menos frecuentes, e os gastos do gandeiro, tamén menores.
O municipio de Friol, segundo datos do Concello, ten case 600 explotacións de gando vacún, repartidas por gran parte das parroquias e cun lixeiro predominio das de leite fronte ás de carne (aproximadamente, un 60 % das primeiras e un 40 % das segundas).