A muller non quixo declarar ante a xuíza, que a acusa dun delito de homicidio ou asasinato
01 jun 2019 . Actualizado ás 09:49 h.A xuíza do Xulgado Mixto número 1 de Vilalba trasladouse onte ao Hospital Universitario Lucus Augusti (HULA) de Lugo para tomar declaración, en calidade de investigada, a Ana Sandamil, nai da nena achada morta no seu domicilio na localidade de Muimenta (Cospeito) o pasado 3 de maio. Coa presenza dun avogado nomeado pola investigada, esta acolleuse ao seu dereito a non declarar. Entón, a xuíza acordou para ela prisión provisional, comunicada e sen fianza, acusada dun delito de homicidio ou asasinato da nena, o que se determinará a medida que avance a instrución xudicial.
Con todo, a muller permanecerá ingresada no módulo de custodia de presos do hospital lucense porque aínda non recibiu a alta médica. Cando a reciba será internada no cárcere que lle corresponda.
A comitiva xudicial decidiu trasladarse ao hospital despois de que os facultativos que a tratan no módulo de psiquiatría entendesen que xa estaba en condicións de prestar declaración ante a xuíza.
O día dos feitos
A pequena Desirée Leal Sandamil, de 7 anos, apareceu morta ás oito da mañá do 3 de maio na súa casa de Muimenta. Foi a súa avoa quen deu o aviso ao 112. Esa noite a menor durmira coa súa nai, circunstancia que non era habitual. A muller levantouse pola mañá e díxolle á avoa que a nena estaba morta na cama. Entón a avoa alertou aos servizos de urxencia, mentres a nai da nena permanecía en casa absorta e envolta nunha manta, como a atoparon os servizos de urxencia cando chegaron coa ambulancia. Acharon á nena espida, tapada coa roupa de cama e con lesións na cara, beizos e pescozo, que puideron deberse a unha asfixia mecánica que alguén lle aplicou tapándolle a boca despois dunha posible inxesta de medicamentos.
Os profesionais do 061 intentaron reanimar á pequena, pero non foi posible. Falecera. A casa atopábase un tanto desordenada, e a nai estivo envolvida nunha manta e abstraída mentres os sanitarios intentaban a reanimación da súa filla. Tamén estivo así durante o resto da mañá, durante as horas que a xuíza e os investigadores estiveron na casa. A algunhas persoas díxolles que descoñecía que sucedera, pero a outras lles indicou que a nena inxerira pastillas que ela tiña que tomar co gallo dos seus problemas mentais.
Desde o primeiro momento a nai converteuse en sospeitosa, e por iso foi enviada ao HULA pero con orde de que non puidese saír do hospital. Os investigadores recolleron diferentes mostras na vivenda para analizar. levaron pixamas, panos, roupa, pastillas e a botella de auga da nena na que apareceu unha sustancia negruzca que podería ser unha mestura de pastillas trituradas con cola para alterar o sabor. Varios indicios que unha vez examinados converteranse en probas para iniciar un posible proceso penal contra a nai.
«Se falecese na miña casa, eu estaría preso»
O pai de Desirée, José Manuel Leal, dixo onte tras coñecer a detención da súa exparella, que el xa sabía desde un primeiro momento que a súa filla non morrera por causas naturais, porque estaba perfectamente de saúde. Asegurou que descoñecía a situación médica do seu ex pero que se o soubese xa tería solicitado a retirada da custodia ou denunciado a situación. Xa nomeou avogado e intentará pedir responsabilidades aos que deberían coñecer o estado de saúde de Ana Sandamil Novo, e que puidesen evitar que a súa filla falecese.
O pai manifestou que non entendía o longo tempo de segredo de sumario, do que se cumprirá un mes o vindeiro luns, aínda que entendería que se deba a que poida haber máis persoas relacionadas co caso e que a xuíza trate de protexer eses datos para completar a investigación. Dixo ter o convencemento interno de que a súa filla puido estar a ser envelenada para que falecese esa fin de semana na súa casa de Roupar. «Se a nena falecese na miña casa eu estaría preso desde ese mesmo día e isto sería un show». Con todo, a menor apareceu morta o venres pola mañá en casa materna e non se ía a marchar a Roupar ata a tarde dese día. «O peor é que non volverei ver á miña filla, pero polo menos que se faga xustiza», pediu.
Días antes, ela deulle fotos á nena para que as repartise a toda a familia paterna
A detención de Ana Sandamil Novo, a nai da pequena Desirée Leal, foi tomada onte na casa paterna con moita ira e impotencia, pero á vez con certo alivio por ver que o suceso non está paralizado e trabállase en esclarecer o sucedido. «Estaba todo moi calado e daba a sensación de que a miña filla podería ter morto por causas naturais, cousa que eu sabía desde o primeiro momento que non era así», manifestou José Manuel Leal, que agora empeza a atar cabos e vanlle coincidindo certos comportamentos estraños que ultimamente facía a nai da súa nena. «A miña exparella so quería que lle pasara os cartos e deixábame a nena o mínimo que podía. Eu loitaba pola custodia compartida pero non me podía costear un avogado particular e un de oficio sobrepasaba o salario. Intentei chegar a un acordo con ela para que ma deixara algún día que eu librara, pero nada. Non me enviaba nin traballos nin fotos da nena na escola. E sen embargo, a última fin de semana que tiven a Desi, trouxo fotos de carné para todos os da casa porque lle dixera súa nai que nolas dera», relata José Manuel, que lembra que as últimas palabras que intercambiou coa súa exparella foron o último domingo que deixou á súa pequena en Muimenta. «Achegouse ó meu coche e díxome que posiblemente teríamos que facer unha analítica por unha posible alerxia da nena, e que lle faltaba unha vitamina», asegura.
«Porque non, papi»
José Manuel Real indicou que resultou moi raro que a nena non fóra á festa da Filloa a tocar a pandereita. «A fin de semana que estivo con nós, insistiunos en que a fóramos ver tocar a pandeireta o día un de maio, con motivo da festa da filloa. Eu non podía ir porque traballaba de tarde pero ían ir meus pais, meus irmáns e sobriñas. Estiveron chamando ao móbil da miña exparella toda a mañá para saber á hora que tocaba e non lles colleu o teléfono. Pola noite, chamei eu e colleume. Pregunteille á nena por que non fora a festa e a resposta foi "porque non, papi". Despedímonos con un quérote moito e ata venres, pero ese venres nunca chegará», indica esnaquizado o pai da pequena.
Por outra banda, José Manuel agradece o traballo que están a levar a cabo desde o primeiro día a Garda Civil e todos os investigadores para tratar de esclarecer o falecemento da súa pequena Desirée.