Queixas por atrasos para consultas e para receitas no centro médico de Castro de Ribeiras de Lea
CASTRO DE REI
Sanidade destaca que o edificio está aberto polas tardes para dar máis servizo
15 oct 2021 . Actualizado ás 05:00 h.A situación do centro médico de Castro de Ribeiras de Lea desata de novo críticas de veciños, que consideran excesivo o tempo de espera para ser atendidos nunha consulta ou para recoller unhas receitas. A Consellería de Sanidade, pola súa banda, achaca a situación á dificultade de cubrir vacantes como as que afectan a ese centro de saúde, con dous profesionais de baixa nestes momentos.
Algún veciño que solicitou consulta esta semana queixouse de que ata o día 25 non sería atendido, o que suporá unha espera duns 15 días desde o momento da petición. Doutra banda, unha solicitude de receitas tramitada este xoves será atendida o vindeiro martes, segundo manifestou a persoa que a tramitou. Os problemas destes días son continuación doutros que xa apareceron en meses pasados, relacionados coa falta de persoal nalgúns momentos.
Entre os usuarios hai malestar por esa repetición dos atrasos, e o PSOE de Castro de Rei mesmo solicitou, en semanas pasadas, a celebración dun pleno extraordinario para tratar o asunto e reclamar á Xunta unha solución. Tamén o BNG fíxose eco da situación e solicitou máis persoal. Segundo Sanidade, o centro médico de Castro de Ribeiras de Lea está agora atendido durante as mañás por dous médicos e abre tamén polas tardes para paliar os problemas derivados desa falta de persoal.