Falece un home de 60 anos en Castro de Rei tras ser atropelado polo seu propio tractor
CASTRO DE REI
O suceso tivo lugar en San Queitano, unha zona rural do municipio. A vítima non puxo o freo de man e foi acadada polo vehículo mentres traballaba unha leira allea, polo que se trata dunha morte por accidente laboral
11 sep 2021 . Actualizado ás 13:41 h.Os servizos de urxencias de Galicia informaron a mañá deste venres do falecemento de un home de 60 anos en Castro de Rei despois de ser atropelado polo seu propio tractor. O tráxico suceso tivo lugar no San Queitano. O home estaba a traballar na leira cando o acadou o gran vehículo, ao que non lle puxo correctamente o freo de man, segundo confirmaron as autoridades que acudiron ao lugar. A vítima é I. L., orixinario de Monfero (Ferrol), pero estaba en Lugo porque era un traballador autónomo vinculado á empresa Tragsa. A leira que traballaba non era a súa senón dunha persoa que lle pagaba para que trasladase a madeira desde o río ata a parte alta do terreo, polo que se cataloga como unha morte por accidente laboral.
Os feitos sucederon uns minutos antes das doce. Os profesionais de Urxencias Sanitarias de Galicia-061 foron alertados e avisaron ao 112 do accidente. Acto seguido, os xestores do Centro Integrado de Atención ás Urxencias (CIAE) 112 Galicia solicitaron a intervención dos Bombeiros de Vilalba e dos axentes da Garda Civil. Xa no lugar do suceso, os servizos sanitarios tan só puideron confirmar o falecemento da persoa accidentada, que tivo que ser liberada polos membros do Servizo de Prevención, Extinción de Incendios e Salvamento de Vilalba. Unhas dúas horas despois, acudiu ao lugar a familia da vítima e a funeraria de Ferrol para trasladar o corpo.