Malestar en Castro pola montaxe dos Pepa Pig de Italia en zona de autocaravanas
CASTRO DE REI
Autocaravanistas denuncian que unha familia leva máis dun mes usando un espazo público para un fin particular
13 dic 2018 . Actualizado ás 19:40 h.Malestar entre os autocaravanistas de Castro de Rei polo asentamento dunha familia italiana nun aparcadoiro mixto e área para pasa a noite destes vehículos.
A familia, dedicada á realización de espectáculos infantís (mestura de circo, malabaristas, pallasos, personaxes animados...) presentouse na zona hai máis dun mes e alí segue. Estacionou os seus tres vehículos (con placas de matrícula de Italia, Madrid e Portugal), escolarizou a algún dos seus fillos no colexio do pobo e facendo uso de servizos gratuítos como wifi e corrente, fai a súa vida.
Esta situación indigna aos autocaravanistas da zona, que denuncian a utilización dun espazo público de forma particular. Engaden ademais, que dado a montaxe que teñen establecido na área asustan aos demais usuarios. «Un día vin a baleirar o inodoro da miña autocaravana e non puiden porque tiñan unha mangueira con brida amais e non deixaban bascular a tapa», explica el autocaravanista, Jesús Gallego. «Días despois veu un compañeiro a facer o mesmo e tampouco puido, polo que lle advertiu ao pai desta familia que lle ía a retirar a mangueira para poder baleirar. Cerroulle a billa e agrediuno. Tivo que vir a Garda Civil», explica este afectado.
Segundo o relato doutro autocaravanista, ao pouco tempo deste encontrón cambiouse a mangueira e agora pódese baleirar. «É certo que a familia non ocupa toda a área e quedan espazos para que estacionen outras autocaravanas, pero ao ver todo este asentamento aquí non para ninguén. A xente chega aquí ve o ambiente e vaise porque isto da unha imaxe nefasta», afirma estoutro afectado, que trae a colación a ponte da Constitución, cando chegaron varios autocaravanistas de diferentes países e ao ver o escenario continuaron a súa ruta. «Chegou unha autocaravana de Dinamarca, quedou mirando e seguiu o traxecto. Esta é unha área de paso, aquí ninguén ven para quedarse días pero agora nin paran», explican estes afectados, que insisten en que a área non é para asentarse e que son 48 horas o máximo que se pode permanecer nela.
«Estamos aquí de paso»
Pola súa banda, Franco Minetti, o pai desta familia italiana, asegura que dispón de autorización para estar acampado na zona. «Desde o concello hanme autorizado para estar aquí. No mes de setembro xurdiume un problema de colon e estanmo tratando no Hospital de Santiago de Compostela. Vou dúas veces á semana para que me poñan a medicación. Rematarei o día 22 deste mes e despois de Nadal conto con marcharnos de aquí», explica este italiano que segundo indica viño a parar a Castro de Rei porque tivo que irse doutros sitios por problemas de obras», explica este animador infantil, que asegura que está aquí de paso e por unha enfermidade.
Desde o Concello indican que lle autorizaron permanecer uns días na zona dados os seus problemas de saúde pero xa consideran a situación un tanto abusiva.