Pol pasaría a depender da Pontenova e Castroverde, ao grupo dos Ancares, con sede en Becerreá
28 oct 2021 . Actualizado ás 18:29 h.Cinco anos despois de que o Concello da Fonsagrada decidise pechar a base do Grupo de Emerxencia Supramunicipal (GES) polo elevado custo que lle supuña o seu mantemento, todo parece indicar que a vila da montaña lucense volverá ser o centro operativo do GES, posto que ía ocupar Baleira.
Segundo informa Vicepresidencia da Xunta a Comisión de Seguimento dous Grupos de Emerxencia Supramunicipais (GES) aprobou a proposta de reconfiguración do mapa de urxencias de varios grupos da provincia de Lugo «para optimizar a atención e ofrecer un menor tempo de resposta». Os traballadores pediran hai dous anos á Deputación que volvesen impulsar os GES de Guitiriz e da Fonsagrada. Ao final, a base que dá cobertura a Guitiriz instalouse en Friol, que dá servizos tamén a Begonte, Palas e Outeiro.
A proposta, sinala a Xunta, saíu adiante cos votos favorables da Xunta, da Deputación de Ourense, e, no caso da FEGAMP, cun voto a favor e unha abstención por parte dos dous representantes cos que contaba esta entidade na comisión.
A Deputación de Lugo votou en contra xa que afirmou que non había vontade por parte do goberno da Fonsagrada de volver recuperar o GES e só houbo unha moción aprobada no pleno pola oposición para reclamalo. A Deputación de Lugo tamén se queixa de que na proposta presentada pola Xunta non se especificase quen deberá asumir o custo desta sede. Hai que lembrar que a anterior base do GES na Fonsagrada fracasou porque o concello lucense non podía asumir cos seus recursos os elevados custos que supuña dar servizos de urxencias a municipios con moita dispersión de poboación, gran número de quilómetros de estradas e moi vulnerables a incidencias meteorolóxicas e ambientais de todo tipo.
Así, segundo a proposta da Xunta votada para o GES da Montaña Oriental con sede en Baleira, aprobouse cambiar a base ao concello da Fonsagrada, «ao considerarse que permitiría atender a máis poboación en menos tempo». Este grupo abarcaría tamén aos municipios de Baleira, Negueira de Muñiz e Ribeira de Piquín. Ademais, o concello de Pol , incluído nun principio neste GES, pasaría a ser atendido polo de Mariña Central e Oriental con base na Pontenova, da mesma forma que o de Castroverde se integrará no Os Ancares-Lugo-Sarria con sede en Becerreá.
Por outra banda, a Xunta sinala que agarda unha nova reunión da comisión á resposta da Deputación de Lugo para aumentar o persoal para que todos os GES teñan 12 efectivos, equiparar o custo dos 4 servizos municipais de urxencias da comunidade ao resto de GES e levar a cabo unha actualización salarial dos grupos. A medida afectaría na provincia de Lugo aos GES de Folgoso de Courel e Quiroga.
